- રવિચંદ્રન અશ્વિને ટેસ્ટમાં ખાસ સિદ્ધિ હાંસલ કરી
- ઈંગ્લેન્ડ સામે 1000 રન અને 100 વિકેટ ઝડપી
- ઈંગ્લેન્ડ સામે 100 વિકેટ લેનાર પ્રથમ ભારતીય
ભારતના દિગ્ગજ સ્પિનર રવિચંદ્રન અશ્વિને ટેસ્ટ ક્રિકેટમાં ઈતિહાસ રચ્યો છે. શુક્રવાર, 23 ફેબ્રુઆરીએ રાંચીમાં શરૂ થયેલી પાંચ મેચની ટેસ્ટ સિરીઝની ચોથી મેચના પહેલા દિવસે અશ્વિને તેની પ્રથમ સફળતા હાંસલ કરતાની સાથે જ તે એવા ખેલાડીઓની યાદીમાં સામેલ થઈ ગયો હતો, જેણે એક દેશ સામે 100 વિકેટ અને 1000 રન બનાવ્યા છે. અશ્વિન કોઈ દેશ સામે આ સિદ્ધિ હાંસલ કરનાર એશિયાનો પ્રથમ ખેલાડી અને વિશ્વનો સાતમો ખેલાડી બની ગયો છે.
રવિચંદ્રન અશ્વિને ખાસ સિદ્ધિ હાંસલ કરી
રવિચંદ્રન અશ્વિને ઈંગ્લેન્ડ સામે 1085 રન બનાવ્યા છે અને હવે તેણે 100 વિકેટ પણ લીધી છે. તે ઈંગ્લેન્ડ સામે 100 વિકેટ લેનારો ભારતનો પ્રથમ ખેલાડી બની ગયો છે. અશ્વિન પહેલા બી ચંદ્રશેખરના નામે 95 વિકેટ હતી. અનિલ કુંબલેએ ઈંગ્લેન્ડ સામે 92 વિકેટ ઝડપી હતી. પરંતુ અશ્વિને આ દિગ્ગજોને પાછળ છોડી દીધા છે. ઈંગ્લેન્ડ સામે આંતરરાષ્ટ્રીય ક્રિકેટમાં પણ અશ્વિને હવે ભારત માટે સૌથી વધુ વિકેટ ઝડપી છે.
અશ્વિને જોની બેયરસ્ટોને એલબીડબલ્યુ આઉટ કરીને ટેસ્ટ ક્રિકેટમાં ઈંગ્લેન્ડ સામે 100મી વિકેટ લીધી હતી. તેણે આ ટીમ સામે 1000 રન પૂરા કરી લીધા છે. ઓસ્ટ્રેલિયાના નાથન લાયને ઈંગ્લેન્ડ સામે 100 કે તેથી વધુ વિકેટ લેવામાં સફળ રહ્યો છે, પરંતુ તેણે આ દેશ સામે 1000થી વધુ રન બનાવ્યા નથી. શેન વોર્ને પણ ઈંગ્લેન્ડ સામે 100થી વધુ વિકેટ લીધી છે.
અશ્વિન ખાસ ક્લબમાં થયો સામેલ
અશ્વિન એશિયાનો પહેલો બોલર પણ બન્યો છે જેણે એકથી વધુ ટીમો સામે ટેસ્ટમાં 100 કે તેથી વધુ વિકેટ લીધી હોય. અશ્વિને ઓસ્ટ્રેલિયા અને ઈંગ્લેન્ડ સામે આ કારનામું કર્યું છે. મુથૈયા મુરલીધરન, શેન વોર્નર અને જેમ્સ એન્ડરસને ત્રણ-ત્રણ દેશો સામે ટેસ્ટમાં 100થી વધુ વિકેટ લીધી છે. જ્યારે, લાન્સ ગિબ્સ, કર્ટની વોલ્શ, કર્ટલી એમ્બ્રોસ, ગ્લેન મેકગ્રા, નાથન લાયન અને આર અશ્વિને 2-2 દેશો સામે 100-100 વિકેટ લીધી છે.
ટેસ્ટમાં વિપક્ષી ટીમ સામે 1000 રન અને 100 વિકેટ
- જ્યોર્જ ગિફેન વિ. ઈંગ્લેન્ડ
- મોની નોબલ વિ. ઈંગ્લેન્ડ
- વિલ્ફ્રેડ રોડ્સ વિ. ઓસ્ટ્રેલિયા
- ગારફિલ્ડ સોબર્સ વિ. ઈંગ્લેન્ડ
- ઇયાન બોથમ વિ. ઓસ્ટ્રેલિયા
- સ્ટુઅર્ટ બ્રોડ વિ. ઓસ્ટ્રેલિયા
- આર અશ્વિન વિ. ઈંગ્લેન્ડ
