- રવિચંદ્રન અશ્વિને IPLના ઓલ ટાઈમ બેસ્ટ પ્લેઈંગ ઈલેવનની પસંદગી કરી
- મહેન્દ્ર સિંહ ધોની, રોહિત શર્મા અને વિરાટ કોહલી જેવા ખેલાડીઓનો સમાવેશ
- અશ્વિને મહેન્દ્ર સિંહ ધોનીને પોતાની ટીમનો કેપ્ટન બનાવ્યો
ટીમ ઈન્ડિયાના અનુભવી સ્પિનર રવિચંદ્રન અશ્વિને IPLના ઓલ ટાઈમ બેસ્ટ પ્લેઈંગ ઈલેવનની પસંદગી કરી છે. અશ્વિને પોતાની ટીમમાં શાનદાર ખેલાડીઓનો સમાવેશ કર્યો છે, જેમાં મહેન્દ્ર સિંહ ધોની, રોહિત શર્મા અને વિરાટ કોહલી જેવા ખેલાડીઓનો સમાવેશ થાય છે. આ સાથે જ અશ્વિને સુનીલ નારાયણ અને રાશિદ ખાનને પણ પોતાની ટીમમાં સામેલ કર્યા છે. જોકે, ક્રિસ ગેલ, કિરન પોલાર્ડ અને હાર્દિક પંડ્યા જેવા દિગ્ગજ ખેલાડીઓને અશ્વિનની ટીમમાં સ્થાન મળ્યું નથી.
એમએસ ધોનીના હાથમાં ટીમની કમાન
અશ્વિને IPLના સફળ કેપ્ટનોમાંના એક મહેન્દ્ર સિંહ ધોનીને પોતાની ટીમનો કેપ્ટન બનાવ્યો છે. એમએસ ધોનીની ટીમના વિકેટકીપર તરીકે પણ પસંદગી કરવામાં આવી છે. મહેન્દ્ર સિંહ ધોની IPLના શ્રેષ્ઠ ફિનિશર્સમાંથી એક છે. અશ્વિન એમએસ ધોનીની કપ્તાનીમાં IPLમાં ચેન્નાઈ સુપર કિંગ્સ તરફથી પણ રમી ચૂક્યો છે.
જાણો કોને ટીમમાં સ્થાન મળ્યું
અશ્વિને પોતાની ટીમમાં ઓપનિંગ બેટ્સમેન તરીકે રોહિત શર્મા અને વિરાટ કોહલીનો સમાવેશ કર્યો છે. આ બંને IPLના શ્રેષ્ઠ બેટ્સમેનોમાંના એક છે. મિડલ ઓર્ડરમાં સુરેશ રૈના, સૂર્યકુમાર યાદવ અને એબી ડી વિલિયર્સ અને મહેન્દ્ર સિંહ ધોની જેવા દિગ્ગજ ખેલાડીઓને રાખવામાં આવ્યા છે. જ્યારે રાશિદ ખાન અને સુનીલ નારાયણને ઓલરાઉન્ડર તરીકે ટીમમાં સ્થાન આપવામાં આવ્યું છે. બોલિંગમાં અશ્વિને ભુવનેશ્વર કુમાર, જસપ્રિત બુમરાહ અને લસિથ મલિંગાને સામેલ કર્યા છે, જેઓ એકલા હાથે મેચને પલટાવવાની શક્તિ ધરાવે છે.
અશ્વિને પસંદ કરી IPLની ઓલ ટાઈમ પ્લેઈંગ-11 ટીમ
મહેન્દ્ર સિંહ ધોની (કેપ્ટન અને વિકેટકીપર), રોહિત શર્મા, વિરાટ કોહલી, સુરેશ રૈના, સૂર્યકુમાર યાદવ, એબી ડી વિલિયર્સ, સુનીલ નારાયણ, રાશિદ ખાન, ભુવનેશ્વર કુમાર, જસપ્રિત બુમરાહ અને લસિથ મલિંગા.
