Rohit Sharmaએ કર્યો રેકોર્ડ્સનો વરસાદ, હજુ પણ 14 વર્ષનો ઇંતજાર ચાલુ

• રોહિત શર્માએ ઓસ્ટ્રેલિયા સામેની મેચમાં શાનદાર પ્રદર્શન કર્યું
  
• રોહિત શર્મા આ મેચમાં સદી ફટકારવામાં ચૂક્યો હતો
• રોહિતે વિરાટ-યુવરાજ જેવા દિગ્ગજોને પાછળ છોડ્યા

રોહિત શર્માએ T20 વર્લ્ડકપમાં ઓસ્ટ્રેલિયા સામેની મેચમાં શાનદાર પ્રદર્શન કર્યું હતું. ભારતીય કેપ્ટને તોફાની બેટિંગ કરી અને 41 બોલમાં 92 રનની વિસ્ફોટક ઇનિંગ રમી. રોહિત શર્માનો સ્ટ્રાઈક રેટ 224 હતો અને તેના બેટમાંથી 8 છગ્ગા અને 7 ચોગ્ગા આવ્યા હતા. રોહિત શર્મા આ મેચમાં સદી ફટકારવામાં ચૂકી ગયો હતો પરંતુ તેણે કેટલાક એવા રેકોર્ડ પોતાના નામે કર્યા જે ખરેખર આશ્ચર્યજનક છે. રોહિતે તેની ઇનિંગ્સમાં વિરાટ કોહલી અને યુવરાજ સિંહ જેવા દિગ્ગજોને પાછળ છોડ્યા હતા.

રોહિતે કર્યો રેકોર્ડ્સનો વરસાદ

• રોહિત શર્માએ માત્ર 19 બોલમાં પોતાની અડધી સદી પૂરી કરી હતી. તે પાવરપ્લે દરમિયાન જ અડધી સદી ફટકારવામાં સફળ રહ્યો હતો અને તે T20 વર્લ્ડકપમાં આ સિદ્ધિ મેળવનાર પ્રથમ કેપ્ટન છે.
• રોહિત શર્માએ ઓસ્ટ્રેલિયા સામે 8 સિક્સર ફટકારી હતી. તે T20 વર્લ્ડકપ મેચમાં સૌથી વધુ સિક્સર મારનાર ભારતીય બેટ્સમેન બની ગયો છે. રોહિતે 2007માં ઈંગ્લેન્ડ સામે 7 સિક્સર ફટકારનાર યુવરાજ સિંહનો રેકોર્ડ તોડ્યો હતો.
• રોહિત શર્મા ટી20 વર્લ્ડકપમાં સૌથી મોટી ઇનિંગ્સ રમનાર ભારતીય કેપ્ટન બની ગયો છે. તમને જણાવી દઈએ કે T20 વર્લ્ડકપમાં અત્યાર સુધી કોઈ કેપ્ટને સદી ફટકારી નથી. આ સાથે જ રોહિત શર્મા ટી20 વર્લ્ડકપમાં ભારત માટે સૌથી મોટી ઇનિંગ રમનાર ઓપનર બની ગયો છે.
• રોહિત શર્માએ ટી20 ઈન્ટરનેશનલમાં 200 સિક્સ પણ પૂરી કરી છે. આ સિદ્ધિ મેળવનાર તે વિશ્વનો એકમાત્ર ક્રિકેટર છે. રોહિત બાદ માર્ટિન ગુપ્ટિલે T20માં સૌથી વધુ 173 સિક્સર ફટકારી છે.
• રોહિત શર્મા T20 વર્લ્ડકપ 2024માં સૌથી ઝડપી અડધી સદી ફટકારનાર ખેલાડી બની ગયો છે. રોહિતે 19 બોલમાં અડધી સદી ફટકારીને એરોન જોન્સ અને ક્વિન્ટન ડી કોકને પાછળ છોડી દીધા હતા.

નિશાના પર આવ્યો સ્ટાર્ક

મિચેલ સ્ટાર્ક માટે આજનો દિવસ ખાસ નહોતો. રોહિત શર્માએ તેની બીજી ઓવરમાં જ તેને નિશાન બનાવ્યો હતો. આ દરમિયાન તેણે એક જ ઓવરમાં 29 રન બનાવ્યા હતા. ટી20 વર્લ્ડકપમાં સ્ટાર્કની આ સૌથી ખરાબ ઓવર છે. જોકે તેણે જ રોહિત શર્માને આઉટ કર્યો હતો.

14 વર્ષનો ઇંતજાર ચાલુ

રોહિત શર્મા ઓસ્ટ્રેલિયા સામે માત્ર 8 રનથી પોતાની સદી ચૂકી ગયો હતો. તેની પાસે T20 વર્લ્ડ કપમાં સદી ફટકારનાર બીજો ભારતીય બનવાની તક હતી. સુરેશ રૈનાએ T20 વર્લ્ડ કપમાં ભારત માટે એકમાત્ર સદી ફટકારી છે. તેણે T20 વર્લ્ડકપ 2010માં દક્ષિણ આફ્રિકા સામે 101 રન બનાવ્યા હતા.