શાકિબ અલ હસને બાંગ્લાદેશના તખ્તાપલટ પર તોડ્યું મૌન, કહી મોટી વાત

બાંગ્લાદેશના દિગ્ગજ ખેલાડી શાકિબ અલ હસને પહેલીવાર બાંગ્લાદેશમાં તખ્તાપલટ પર પોતાનું મૌન તોડ્યું છે. શાકિબ અલ હસન પર બાંગ્લાદેશમાં આંદોલન દરમિયાન હત્યાનો પણ આરોપ હતો. પરંતુ તે સમયે તે કેનેડામાં ક્રિકેટ રમી રહ્યો હતો. તેણે ભારત સામેની ટેસ્ટ સિરીઝ દરમિયાન જ ટેસ્ટ ક્રિકેટમાંથી નિવૃત્તિની જાહેરાત કરી હતી. જો કે હવે તેણે પોતાના સોશિયલ મીડિયા હેન્ડલ દ્વારા આંદોલનકારીઓની માફી માંગી છે.

શાકિબ અલ હસને માફી માંગી

બાંગ્લાદેશના આ મહાન ખેલાડીએ પોતાના સોશિયલ મીડિયા પર લખ્યું છે કે સૌ પ્રથમ હું તે તમામ વિદ્યાર્થીઓ માટે મારું સન્માન વ્યક્ત કરું છું જેમણે પોતાના જીવનનું બલિદાન આપ્યું અને ભેદભાવ વિરોધી ચળવળનું નેતૃત્વ કર્યું. કોઈ બલિદાન કોઈ પ્રિય વ્યક્તિની ખોટની ભરપાઈ કરી શકતું નથી. કંઈપણ લોકોનું જીવન પાછું લાવી શકતું નથી. જરૂરિયાતના આ સમયમાં જેઓ મારા મૌનથી દુઃખી થયા છે. હું તેની લાગણીઓનું સન્માન કરવા માંગુ છું અને તેની માફી પણ માંગુ છું.

શાકિબે સાઉથ આફ્રિકા સામેની ટેસ્ટ સિરીઝમાં પોતાની છેલ્લી ટેસ્ટ સિરીઝ રમવાની ઈચ્છા વ્યક્ત કરી છે. જો કે આ સમયગાળા દરમિયાન તેણે સરકાર પાસે પોતાની સુરક્ષાની માંગ કરી છે. ભારતમાં ટેસ્ટ સિરીઝ રમ્યા બાદ શાકિબ UAE ગયો હતો. બીજી તરફ વર્તમાન સરકારના સ્પોર્ટ્સ એડવાઈઝર આસિફ મહમૂદે કહ્યું છે કે શાકિબને સુરક્ષા આપવામાં આવશે. પરંતુ તે પહેલા તેણે પોતાનું રાજકીય વલણ સ્પષ્ટ કરવું જોઈએ.

શાકિબે સાંસદ બનવાનું જણાવ્યું કારણ 

શાકિબે શેખ હસીના સરકારમાં સાંસદ તરીકે ચૂંટાયા હતા. આ અંગે વાત કરતા શાકિબે કહ્યું કે રાજનીતિમાં આવવાનો મારો એકમાત્ર હેતુ મારા વિસ્તાર મગુરાને વિકાસ તરફ લઈ જવાનો છે. આ વિસ્તારમાં પ્રગતિ કરવાની મારી ઈચ્છાએ મને સાંસદ બનવાની પ્રેરણા આપી. પરંતુ મારી ઓળખ બાંગ્લાદેશના ક્રિકેટર તરીકે છે.

શાકિબનું તાજેતરનું પ્રદર્શન

શાકિબ અલ હસન ભારત સામે વધુ પ્રભાવ પાડી શક્યો ન હતો. તેણે પ્રથમ મેચમાં 32 અને 25 રન બનાવ્યા હતા. જ્યારે તેને કોઈ સફળતા મળી ન હતી. બીજી મેચમાં, અનુભવી ઓલરાઉન્ડરે 9 અને 0 રન બનાવ્યા અને બોલિંગમાં 4 વિકેટ લીધી હતી.