- બોર્ડે 2022માં કુલ 6.3 અબજ રૂપિયાની કમાણી કરી હતી
- શ્રીલંકા ક્રિકેટ દ્વારા અત્યાર સુધીની સૌથી વધુ વાર્ષિક આવક
- ઇન્ટરનેશનલ-ડોમેસ્ટિક ક્રિકેટ, સ્પોન્સરશિપ કોન્ટ્રાક્ટનો ફાયદો
શ્રીલંકા ક્રિકેટ બોર્ડે 2022માં કમાણીના તમામ રેકોર્ડ તોડી નાખ્યા છે. બોર્ડે 2022માં કુલ 6.3 અબજ રૂપિયાની કમાણી કરી હતી. આ શ્રીલંકા ક્રિકેટ દ્વારા અત્યાર સુધીની સૌથી વધુ વાર્ષિક આવક છે. બોર્ડ તરફથી એક રિલીઝમાં કહેવામાં આવ્યું છે કે, “નવીનતમ આવક વૃદ્ધિ ચાર મુખ્ય રીતે થઈ છે. આમાં ઇન્ટરનેશનલ ક્રિકેટ, ડોમેસ્ટિક ક્રિકેટ, સ્પોન્સરશિપ કોન્ટ્રાક્ટ અને ICCના વાર્ષિક સભ્ય હોવાનો સમાવેશ થાય છે.
નવું બંધારણ તૈયાર કરવા 10 સભ્યોની સમિતિની રચના
ગુરુવારે એવો પણ અહેવાલ હતો કે રમત પ્રધાન રોશન રણસિંઘે SLC માટે નવું બંધારણ તૈયાર કરવા માટે 10 સભ્યોની સમિતિની નિમણૂક કરી છે. આ પેનલનું નેતૃત્વ સુપ્રીમ કોર્ટના નિવૃત્ત ન્યાયાધીશ કેટી ચિત્રસિરી કરશે. આ સમિતિમાં ચારિથ સેનાનાયકે અને ફરવીઝ મહારૂફ સહિત અનેક કાનૂની દિગ્ગજો અને ભૂતપૂર્વ રાષ્ટ્રીય ક્રિકેટરોનો સમાવેશ થાય છે. રાણાસિંઘેએ કહ્યું કે તેણે આ માટે ICC પાસેથી માર્ગદર્શન અને નિષ્ણાતોની સલાહ માંગી છે. આગામી બે મહિનામાં નવું બંધારણ તૈયાર થઈ જશે.
શ્રીલંકા એશિયા કપ 2022માં બન્યું હતું ચેમ્પિયન
2022માં રમાયેલા એશિયા કપમાં શ્રીલંકા ચેમ્પિયન બન્યું હતું. ટીમે ફાઇનલમાં પાકિસ્તાનને 23 રને હરાવીને ટાઇટલ જીત્યું હતું. ટીમે છઠ્ઠી વખત ટુર્નામેન્ટ જીતી હતી. શ્રીલંકાએ પ્રથમ વખત 1986માં એશિયા કપ જીત્યો હતો. 2022માં રમાયેલા એશિયા કપમાં શ્રીલંકા શાનદાર લયમાં જોવા મળી હતી. ટીમ અફઘાનિસ્તાન સામે માત્ર પ્રથમ મેચ હારી હતી. આ પછી ટીમે તમામ મેચ જીતી લીધી હતી. આમાં ભારત અને પાકિસ્તાન જેવી ટીમો પણ સામેલ હતી.
