- સૂર્યકુમાર યાદવ બન્યો T20 ઈન્ટરનેશનલ ક્રિકેટર ઓફ ધ યર
- સૂર્યાની બેટિંગ એવરેજ 50 અને સ્ટ્રાઈક રેટ 150થી વધુ રહી
- વર્ષ 2023માં સૂર્યાએ 155.95ના સ્ટ્રાઇક રેટથી 733 રન બનાવ્યા
ટીમ ઈન્ડિયાના સ્ટાર બેટ્સમેન સૂર્યકુમાર યાદવ આ દિવસોમાં ઈજાના કારણે ટીમની બહાર છે. સૂર્યકુમાર યાદવને સાઉથ આફ્રિકા પ્રવાસ પર T20 સિરીઝ દરમિયાન કેપ્ટન બનાવવામાં આવ્યો હતો, જ્યારે સૂર્યકુમાર આ સિરીઝમાં જ ઈજાગ્રસ્ત થયો હતો. જે બાદ તેણે સર્જરી પણ કરાવી હતી. હાલમાં, સૂર્યકુમાર યાદવ ઈજામાંથી સાજો થઈ રહ્યો છે, આ દરમિયાન ઈન્ટરનેશનલ ક્રિકેટ કાઉન્સિલ (ICC)એ સૂર્યકુમાર યાદવને મોટી ભેટ આપી છે. હાલમાં સૂર્યકુમાર યાદવ ICC T20 બેટ્સમેન રેન્કિંગમાં નંબર વન પર છે.
સૂર્યકુમાર યાદવને ICCએ આપી ખાસ ભેટ
વર્ષ 2023 સૂર્યકુમાર યાદવ માટે ખૂબ જ ખાસ રહ્યું છે. વર્ષ 2023માં સૂર્યકુમાર યાદવની T20માં બેટિંગ એવરેજ 50 અને સ્ટ્રાઈક રેટ 150થી વધુ રહી છે. વર્ષ 2023માં, સૂર્યકુમાર યાદવે એકલા હાથે ટીમ ઈન્ડિયા માટે ઘણી T20 મેચો જીતી છે. જેની ભેટ હવે ICCએ સૂર્યકુમાર યાદવને આપી છે. ICCએ સૂર્યકુમાર યાદવને T20 ઈન્ટરનેશનલ ક્રિકેટર ઓફ ધ યર 2023 તરીકે પસંદ કર્યો છે. સૂર્યકુમાર યાદવે સતત બીજા વર્ષે આ મોટો એવોર્ડ જીત્યો છે.
આ એવોર્ડ માટે સૂર્યકુમાર યાદવની સાથે સિકંદર રઝા, અલ્પેશ રામજાની અને માર્ક ચેપમેનનું નામ પણ નોમિનેટ કરવામાં આવ્યું હતું. આ તમામને હરાવીને સૂર્યકુમાર યાદવે આ ખિતાબ જીત્યો છે. વર્ષ 2023માં સૂર્યકુમાર યાદવે 17 ઇનિંગ્સમાં 155.95ના સ્ટ્રાઇક રેટથી 733 રન બનાવ્યા હતા. આ દરમિયાન તેણે 2 સદી અને 3 ફિફટી ફટકારી હતી. વર્ષ 2023ની શરૂઆત સૂર્યકુમાર યાદવ માટે કંઈ ખાસ ન હતી. સૂર્યાએ શ્રીલંકા સામે વર્ષની પ્રથમ T20 મેચમાં માત્ર 7 રન બનાવ્યા હતા. આ પછી તેણે સતત રન બનાવ્યા હતા.
વર્ષ 2023માં સૂર્યકુમાર યાદવની શ્રેષ્ઠ ઇનિંગ્સ
- 51 બોલમાં 112 રન (શ્રીલંકા)
- 56 બોલમાં 100 રન (સાઉથ આફ્રિકા)
- 42 બોલમાં 80 રન (ઓસ્ટ્રેલિયા)
- 36 બોલમાં 56 રન (સાઉથ આફ્રિકા)
