- ઓસ્ટ્રેલિયા અને ઓમાન વચ્ચે રમાયેલી મેચમાં કાંગારૂ ટીમનો વિજય થયો
- ટીમની જીતમાં ઓપનર ડેવિડ વોર્નરે પણ મહત્વની ભૂમિકા ભજવી
- વોર્નર આઉટ થયો ત્યારે તેની સાથે એક વિચિત્ર ઘટના બની
ઓસ્ટ્રેલિયા અને ઓમાન વચ્ચે રમાયેલી મેચમાં કાંગારૂ ટીમનો વિજય થયો હતો. કાંગારૂ ટીમની જીતમાં ઓપનર ડેવિડ વોર્નરે પણ મહત્વની ભૂમિકા ભજવી હતી. વોર્નરે આ મેચમાં શાનદાર અડધી સદીની ઇનિંગ રમી હતી. મેચ દરમિયાન જ્યારે વોર્નર આઉટ થઈને ડ્રેસિંગ રૂમ તરફ જઈ રહ્યો હતો ત્યારે તેની સાથે એક વિચિત્ર ઘટના બની હતી. જેનો વીડિયો હાલ સોશિયલ મીડિયા પર ખૂબ જ ઝડપથી વાયરલ થઈ રહ્યો છે.
ડ્રેસિંગ રૂમનો રસ્તો ભૂલી ગયો વોર્નર
આ મેચમાં ડેવિડ વોર્નરે 51 બોલમાં 56 રનની ઇનિંગ રમી હતી. પોતાની ઇનિંગ દરમિયાન વોર્નરે 6 ફોર અને 1 સિક્સર ફટકારી હતી. વોર્નર મેચમાં આઉટ થયા બાદ ડ્રેસિંગ રૂમ તરફ જઈ રહ્યો હતો ત્યારે તે ખોટા ડ્રેસિંગ રૂમમાં પ્રવેશવાનો જ હતો. ઓસ્ટ્રેલિયન ટીમના ડ્રેસિંગ રૂમને બદલે વોર્નર અન્ય ડ્રેસિંગ રૂમ તરફ જતો રહ્યો હતો.
જે પછી કોઈએ વોર્નરને ફોન કરીને કહ્યું કે તે ખોટા ડ્રેસિંગ રૂમ તરફ જઈ રહ્યો છે. તે પછી વોર્નર સીડીઓથી નીચે આવે છે અને તેની ટીમના ડ્રેસિંગ રૂમ તરફ જાય છે. વોર્નરનો આ વીડિયો સોશિયલ મીડિયા પર ખૂબ જ ઝડપથી વાયરલ થઈ રહ્યો છે. આ વીડિયો પર ફેન્સ પણ પોતપોતાની પ્રતિક્રિયા આપી રહ્યા છે.
ઓસ્ટ્રેલિયાએ જીત સાથે શરૂઆત કરી
ઓસ્ટ્રેલિયાએ આ મેચ 39 રને જીતી હતી. ઓમાને ટોસ જીતીને બોલિંગ કરવાનો નિર્ણય લીધો હતો. જે બાદ ઓસ્ટ્રેલિયાએ પ્રથમ બેટિંગ કરતા 164 રન બનાવ્યા હતા. ઓસ્ટ્રેલિયા તરફથી માર્કસ સ્ટોઇનિસે સૌથી વધુ 67 રનની ઇનિંગ રમી હતી. આ સિવાય વોર્નરે 56 રન બનાવ્યા હતા. બીજી તરફ 165 રનના લક્ષ્યનો પીછો કરવા ઉતરેલી ઓમાનની ટીમ માત્ર 125 રન જ બનાવી શકી હતી.
