એડમ ઝમ્પાએ T20Iમાં રચ્યો ઈતિહાસ, આ કારનામું કરનારો પ્રથમ બોલર

• ઓસ્ટ્રલિયન બોલર એડમ ઝમ્પાના નામે ખાસ રેકોર્ડ
  
• એડમ ઝમ્પાએ T20I ક્રિકેટમાં 100 વિકેટ પૂરી કરી
• T20Iમાં 100 વિકેટ લેનારો પ્રથમ ઓસ્ટ્રેલિયન બોલર

T20 વર્લ્ડકપની 24મી મેચ ઓસ્ટ્રેલિયા અને નામિબિયા સામે રમાઈ હતી. આ મેચમાં નામિબિયાના બેટ્સમેનો લાંબા સમય સુધી ઓસ્ટ્રેલિયાની ખતરનાક બોલિંગનો સામનો કરી શક્યા ન હતા. કાંગારૂ ટીમની ખતરનાક બોલિંગ સામે નામિબિયાની આખી ટીમ 20 ઓવર પણ રમી શકી ન હતી અને 17 ઓવરમાં માત્ર 72 રનમાં જ ધ્વસ્ત થઈ ગઈ હતી. આ ટાર્ગેટ ઓસ્ટ્રેલિયાએ 5.4 ઓવરમાં 1 વિકેટના નુકસાને હાંસલ કરી લીધો હતો.

આ મેચમાં ઓસ્ટ્રેલિયાના સ્પિન બોલર એડમ ઝમ્પાએ શાનદાર બોલિંગનું પ્રદર્શન કર્યું હતું. એટલું જ નહીં આ મેચમાં ઝમ્પાએ એક ખાસ રેકોર્ડ પોતાના નામે કર્યો છે. જે આજ સુધી ઓસ્ટ્રેલિયાનો કોઈ બોલર કરી શક્યો નથી.

એડમ ઝમ્પાના નામે ખાસ રેકોર્ડ

ઓસ્ટ્રેલિયા તરફથી નામિબિયા સામે એડમ ઝમ્પાએ શાનદાર બોલિંગ કરી હતી. આ મેચમાં ઝમ્પાએ 4 ઓવરમાં માત્ર 12 રન આપીને 4 વિકેટ ઝડપી હતી. આ સાથે જ ઝમ્પાએ T20 આંતરરાષ્ટ્રીય ક્રિકેટમાં 100 વિકેટ પણ પૂરી કરી લીધી છે. હવે ઝમ્પા T20 ઈન્ટરનેશનલ ક્રિકેટમાં 100 વિકેટ લેનારો પ્રથમ ઓસ્ટ્રેલિયન બોલર બની ગયો છે.

બોલરોએ રંગ રાખ્યો

નામિબિયા સામે ટીમના ફાસ્ટ બોલર મિચેલ સ્ટાર્કને ઈજાના કારણે બહાર બેસાડવામાં આવ્યો હતો. આ પછી પણ કાંગારૂ બોલરોનું શાનદાર પ્રદર્શન જોવા મળ્યું હતું. ઓસ્ટ્રેલિયા તરફથી બોલિંગમાં એડમ ઝમ્પાએ 4 ઓવરમાં 12 રન આપીને 4 વિકેટ, જોશ હેઝલવુડે 4 ઓવરમાં 18 રન આપીને 2 વિકેટ, માર્કસ સ્ટોઈનિસે 3 ઓવરમાં 9 રન આપીને 2 વિકેટ ઝડપી હતી.