- T20 વર્લ્ડકપમાં યુએસએનું શાનદાર પ્રદર્શન
- આજે ભારત અને યુએસએ વચ્ચે રમાશે મેચ
- યુએસએની ટીમમાં બે પાકિસ્તાની ખેલાડીઓનો સમાવેશ
કો-હોસ્ટ અમેરિકન ક્રિકેટ ટીમે T20 વર્લ્ડકપ 2024માં પોતાના પ્રદર્શનથી બધાને ચોંકાવી દીધા છે. અમેરિકન ટીમે પહેલા તેના પડોશી દેશ કેનેડાને કારમી હાર આપી હતી. જે બાદ આ ટીમે પૂર્વ ચેમ્પિયન અને ક્રિકેટના આ ફોર્મેટની રનર અપ ટીમ પાકિસ્તાનને સુપર ઓવરમાં હરાવીને મોટો અપસેટ સર્જ્યો હતો. અમેરિકન ટીમ આ બંને મેચ જીત્યા પછી પણ ટુર્નામેન્ટમાં અપરાજિત છે અને વધુ એક મેચ જીતીને ટુર્નામેન્ટના આગલા તબક્કા એટલે કે સુપર-8માં પહોંચવાની રેસમાં છે.
આવી સ્થિતિમાં, તે આજે રાત્રે ભારતનો સામનો કરવા જઈ રહી છે, જ્યાં તે પોતાનું મજબૂત પ્રદર્શન આપવાનો પ્રયાસ કરશે. અમેરિકાના પ્રદર્શનને જોતા ભારતીય ટીમ તેને હળવાશથી લેવાની ભૂલ નહીં કરે. ભારતે તેની પ્રથમ મેચ આયર્લેન્ડ સામે અને બીજી મેચ પાકિસ્તાન સામે જીતી હતી. સુપર-8માં પહોંચવા માટે ભારત પણ આ મેચમાં જીતની રાહ જોઈ રહ્યું છે.
આ પાકિસ્તાનીઓ પડકાર બની શકે છે
યુએસએની ટીમમાં ભારતીય મૂળના ખેલાડીઓ ઉપરાંત પાકિસ્તાની મૂળના ખેલાડીઓ પણ છે. પાકિસ્તાની મૂળના આ અમેરિકન ખેલાડીઓ આજે ભારત સામે રમવા આવશે તો તેમની પાસે ઈતિહાસ રચવાની તક હશે. ભારત અને યુએસએ વચ્ચે પ્રથમ વખત મેચ રમાઈ રહી છે. આવી સ્થિતિમાં, યુએસએની ટીમ પણ ભારતને હરાવીને ક્રિકેટ જગતમાં મજબૂત પ્રભાવ પાડવાનો પ્રયાસ કરી રહી છે. ભારતીય ટીમે યુએસએ ટીમમાં સામેલ આ “પાકિસ્તાની” ખેલાડીઓથી સાવધ રહેવું પડશે. પાકિસ્તાની મૂળના આ ખેલાડીઓ અલી ખાન અને શયાન જહાંગીર છે. અલી ખાને પણ આ વર્લ્ડકપમાં પોતાના પ્રદર્શનથી લોકોને પ્રભાવિત કર્યા છે.
અલી ખાન
પાકિસ્તાનના પંજાબ પ્રાંતમાં જન્મેલ આ ખેલાડી 2010માં પરિવાર સાથે અમેરિકા પહોંચ્યો હતો. અમેરિકન ક્લબમાંથી ક્રિકેટ રમવાની શરૂઆત કરનાર અલી ખાનને 2016માં અમેરિકન ટીમમાં પસંદ કરવામાં આવ્યો હતો. અલી ખાન અમેરિકન ટીમનો ફાસ્ટ બોલર છે. અલીએ તેની કારકિર્દીમાં અત્યાર સુધી કુલ 10 T20 મેચ રમી છે. જેમાં તેણે 7.95ની ઈકોનોમી સાથે 11 વિકેટ લીધી છે. અલી ખાને એક મેચમાં સૌથી વધુ 3 વિકેટ પણ લીધી છે.
T20 વર્લ્ડકપ 2024માં કેનેડા સામે અલી ખાન મોંઘો સાબિત થયો હતો. તેણે 4 ઓવરમાં 41 રન આપીને 1 વિકેટ લીધી હતી. જ્યારે પાકિસ્તાન સામે અલી ખાને 4 ઓવરમાં 30 રન આપીને 1 વિકેટ લીધી હતી. અલી કેરેબિયન પ્રીમિયર લીગમાં પણ રમી ચૂક્યો છે. માનવામાં આવી રહ્યું છે કે ભારતીય ટીમ સામે યુએસએની પ્લેઈંગ ઈલેવનમાં પણ અલી ખાનનો સમાવેશ કરવામાં આવશે. આવી સ્થિતિમાં, પાકિસ્તાની મૂળનો આ અમેરિકન બોલર ભારતીય ટીમ સામે કેવું પ્રદર્શન કરશે તે જોવું રસપ્રદ રહેશે.
શયાન જહાંગીર
પાકિસ્તાનના કરાચીમાં જન્મેલ શયાન જહાંગીર પણ અમેરિકન ટીમનો એક ભાગ છે. તે બેટ્સમેન અને વિકેટકીપર ખેલાડી તરીકે ઓળખાય છે. શયાન જહાંગીર કેરેબિયન પ્રીમિયર લીગમાં પણ રમી ચૂક્યો છે. શયાન અમેરિકા માટે 2022માં નામિબિયા સામે તેની ડેબ્યૂ મેચ રમ્યો હતો. શયાનના કરિયરની વાત કરીએ તો તે પાકિસ્તાન માટે અંડર-19 ક્રિકેટ રમી ચૂક્યો છે, પરંતુ અત્યાર સુધી શયાન અમેરિકા માટે માત્ર 1 ટી20 મેચ રમ્યો છે. તેણે આ મેચમાં 18 રન બનાવ્યા હતા. તેનો સ્ટ્રાઈક રેટ 90 હતો. આ સિવાય શયાન અમેરિકન ટીમ માટે 12 ODI મેચ પણ રમી ચુક્યો છે. જેમાં તેણે 92.86ની સ્ટ્રાઈક સાથે 338 રન બનાવ્યા છે. શયાને વનડે મેચોમાં એક સદી અને એક અડધી સદી પણ ફટકારી છે. જો અમેરિકન ટીમ ભારતીય ટીમ સામે શયાન જહાંગીરને તક આપે છે તો તેનું પ્રદર્શન કેવું રહેશે તેના પર સૌની નજર રહેશે.
