- T20 વર્લ્ડકપ 2024ની શરૂઆત થઈ ચૂકી છે
- ઈંગ્લેન્ડની ટીમ ટૂર્નામેન્ટમાંથી થઈ શકે છે બહાર
- ઈંગ્લેન્ડને ઓસ્ટ્રેલિયા સામેની મેચ જીતવી જરૂરી
વર્તમાન ચેમ્પિયન ઈંગ્લેન્ડ T20 વર્લ્ડકપ 2024માં ખતરામાં છે. ઈંગ્લેન્ડની ટીમની એક ભૂલ તેને વર્લ્ડકપમાંથી બહારનો રસ્તો બતાવી શકે છે. જો આમ થશે તો T20 વર્લ્ડ કપ 2024માં વધુ એક મોટો અપસેટ જોવા મળશે. આ પહેલા યુએસએની ટીમે પાકિસ્તાનને હરાવીને ટુર્નામેન્ટમાં અપસેટ સર્જ્યો છે. પાકિસ્તાનની ટીમ પણ વર્લ્ડકપમાંથી બહાર થવાની સંભાવનાનો સામનો કરી રહી છે. શા માટે ઈંગ્લેન્ડની ટીમ પર ટૂર્નામેન્ટમાંથી બહાર થવાની તલવાર લટકી રહી છે?
વરસાદ બન્યો વિલન
ઇંગ્લેન્ડે 4 જૂને T20 વર્લ્ડકપમાં તેની સફર શરૂ કરી હતી. આ મેચ સ્કોટલેન્ડ સામે હતી. સ્કોટલેન્ડે ટોસ જીતીને બેટિંગ કરવાનો નિર્ણય લીધો હતો. બેટિંગ કરતી વખતે ટીમે 10 ઓવરમાં 90 રન બનાવ્યા હતા. વરસાદના કારણે આગામી મેચ રમાઈ શકી ન હતી. મેચ ન યોજાવાને કારણે બંને ટીમોને 1-1 પોઈન્ટ આપવમાં આવ્યો હતો.
હવે ઓસ્ટ્રેલિયા સાથે થશે ટક્કર
ટૂર્નામેન્ટમાં હવે ઈંગ્લેન્ડનો સામનો ઓસ્ટ્રેલિયા સામે થશે. ઓસ્ટ્રેલિયાએ 6 જૂને ઓમાનને 39 રને હરાવીને સફરની શરૂઆત કરી હતી. આ મેચમાં ઓસ્ટ્રેલિયાના બેટ્સમેનો અને બોલરો પોતાની લયમાં જોવા મળ્યા હતા. આવી સ્થિતિમાં જ્યારે ઈંગ્લેન્ડ ઓસ્ટ્રેલિયા સામે 8 જૂને રમશે ત્યારે આ મેચ તેમના માટે કોઈપણ સંજોગોમાં આસાન નહીં હોય.
રન રેટનું ધ્યાન રાખવું પડશે
ઈંગ્લેન્ડની ટીમની પ્રથમ મેચ રદ કરવામાં આવી હતી. આવી સ્થિતિમાં તેનો રન રેટ હજુ પણ 0.00 છે. ઈંગ્લેન્ડ T20 વર્લ્ડકપના બી-ગ્રુપમાં છે. સ્કોટલેન્ડ અત્યારે આ ગ્રુપમાં 3 પોઈન્ટ સાથે ટોપ પર છે. તેનો રન રેટ 0.736 છે. ઓસ્ટ્રેલિયા 2 પોઈન્ટ સાથે બીજા સ્થાને છે. ઓસ્ટ્રેલિયાનો રન રેટ 1.950 છે. T20ના સુપર-8 ગ્રૂપમાં પ્રવેશવા માટે ઈંગ્લેન્ડે પોતાની ત્રણેય મેચ જીતવી પડશે. આ મેચ ઓસ્ટ્રેલિયા, ઓમાન અને નામિબિયા સાથે રમાવાની છે. હવે જો ઈંગ્લેન્ડની ટીમ ઓસ્ટ્રેલિયા સામે હારે છે તો સુપર-8માં જવા માટે ઈંગ્લેન્ડ માટે સારો રન રેટ રાખવો સૌથી મહત્વપૂર્ણ રહેશે. તે જ સમયે, જો ઇંગ્લેન્ડ આ મેચ જીતી જશે તો તેના માટે સુપર 8માં જવાનું સરળ બની જશે.
એક ભૂલ તમને ટુર્નામેન્ટમાંથી બહાર લઈ જશે
વર્લ્ડકપમાં ઈંગ્લેન્ડ પહેલાથી જ 1 પોઈન્ટ ગુમાવી ચૂક્યું છે. આવી સ્થિતિમાં, તેણે દરેક ભૂલનું મોટું પરિણામ ભોગવવું પડી શકે છે. ઓસ્ટ્રેલિયા સામેની જીત ઈંગ્લેન્ડના ખેલાડીઓનું મનોબળ વધારશે. પરંતુ જો ઈંગ્લેન્ડ આ મેચ મોટા અંતરથી હારી જશે તો ટુર્નામેન્ટમાંથી બહાર થવાનું જોખમ વધી જશે. ઓસ્ટ્રેલિયા સામે હાર્યા બાદ ઈંગ્લેન્ડને આગામી બે મેચો મોટા અંતરથી જીતવી પડશે એટલું જ નહીં પરંતુ અન્ય ટીમો પર પણ નિર્ભર રહેવું પડશે.
