- T20 વર્લ્ડકપ 2024માં સુપર-8નું ચિત્ર સંપૂર્ણપણે સ્પષ્ટ
- તમામ 8 ટીમોને 4-4ના બે ગ્રુપમાં રાખવામાં આવી છે
- ગ્રુપ-1: ભારત, બાંગ્લાદેશ, અફઘાનિસ્તાન અને ઓસ્ટ્રેલિયા
T20 વર્લ્ડકપ 2024માં સુપર-8નું ચિત્ર સંપૂર્ણપણે સ્પષ્ટ છે. સુપર-8 માટે તમામ આઠ ટીમો કન્ફર્મ થઈ ગઈ છે. તમામ 8 ટીમોને 4-4ના બે ગ્રુપમાં રાખવામાં આવી છે. સુપર-8માં ટીમ ઈન્ડિયા ગ્રુપ-1માં છે. ટીમ ઈન્ડિયાની સાથે ઓસ્ટ્રેલિયા, અફઘાનિસ્તાન અને બાંગ્લાદેશની ટીમોને આ ગ્રુપમાં રાખવામાં આવી છે. જ્યારે યુએસએ, ઈંગ્લેન્ડ, સાઉથ આફ્રિકા અને વેસ્ટ ઈન્ડિઝની ટીમોને સુપર-8ના ગ્રુપ-2માં રાખવામાં આવી છે. સુપર-8ની મેચો 19 જૂનથી શરૂ થવા જઈ રહી છે. પ્રથમ મેચ સાઉથ આફ્રિકા અને યુએસએ વચ્ચે રમાશે.
ભારતે આ ટીમને લઈને સાવધાન રહેવું પડશે
સુપર-8માં ભારતીય ટીમનો પ્રથમ મુકાબલો 20 જૂને અફઘાનિસ્તાન સાથે થશે. આ મેચ ખૂબ જ રોમાંચક રહેવાની છે કારણ કે અફઘાનિસ્તાન હવે પહેલા જેવી નબળી ટીમ રહી નથી. રાશિદ ખાનની કપ્તાનીમાં અફઘાનિસ્તાને આ વર્લ્ડકપમાં શાનદાર પ્રદર્શન કર્યું છે. અફઘાનિસ્તાન આ ટૂર્નામેન્ટમાં અત્યાર સુધી એક પણ મેચ હારી નથી. અફઘાનિસ્તાનની સ્પિન બોલિંગ તેની સૌથી મોટી તાકાત છે. અફઘાનિસ્તાને તેની બોલિંગના આધારે તમામ મેચ જીતી છે. આવી સ્થિતિમાં ટીમ ઈન્ડિયાને અફઘાનિસ્તાનના સ્પિનરો તરફથી આકરા પડકારનો સામનો કરવો પડશે. ટીમ ઈન્ડિયા અફઘાનિસ્તાનને હળવાશથી લેવાનું બિલકુલ પસંદ નહીં કરે.
આ ખેલાડીઓ પડી શકે છે ભારે
આ ટૂર્નામેન્ટમાં અફઘાનિસ્તાનનો ઓપનિંગ બેટ્સમેન રહેમાનુલ્લાહ ગુરબાઝ શાનદાર બેટિંગ કરી રહ્યો છે. ગુરબાઝે અત્યાર સુધી 3 મેચમાં 154ના સ્ટ્રાઈક રેટથી 167 રન બનાવ્યા છે. આ દરમિયાન તેણે 2 ફિફ્ટી પણ ફટકારી છે. આ સિવાય ફઝલહક ફારૂકી બોલિંગમાં શાનદાર પ્રદર્શન કરી રહ્યો છે. દરેક મેચમાં ફઝલક મુશ્કેલ સમયમાં ટીમને વિકેટ આપી રહ્યો છે. અત્યાર સુધી ફઝલકે 3 મેચમાં 12 વિકેટ લીધી છે. આ સિવાય રાશિદ ખાન પણ શાનદાર બોલિંગ કરી રહ્યો છે. આવી સ્થિતિમાં હવે ટીમ ઈન્ડિયાએ આ ખેલાડીઓથી થોડું સાવધાન રહેવું પડશે.
