- T20 વર્લ્ડકપમાં સેમીફાઈનલની રેસ ઘણી રસપ્રદ બની
- 2 મેચ હાર્યા બાદ પણ યુએસએ કરી શકે છે ક્વોલિફાઈ
- યુએસએને ઈંગ્લેન્ડ સામેની મેચ મોટા માર્જિનથી જીતવી પડશે
T20 વર્લ્ડકપમાં સેમીફાઈનલની રેસ ઘણી રસપ્રદ બની ગઈ છે. શનિવારે રમાયેલી મેચમાં યુએસએની ટીમને હારનો સામનો કરવો પડ્યો હતો. સુપર-8માં યુએસએની આ સતત બીજી હાર હતી. આવી સ્થિતિમાં તેના માટે સેમીફાઈનલમાં પહોંચવું ઘણું મુશ્કેલ બની ગયું છે. 2 મેચ હાર્યા બાદ યુએસએનો નેટ રન રેટ -2.908 છે. આવી સ્થિતિમાં પણ યુએસએની ટીમ સેમિફાઈનલ રેસમાંથી બહાર થઈ નથી.
યુએસએ કરી શકે છે ક્વોલિફાઈ
જો યુએસએ સેમિફાઇનલ માટે ક્વોલિફાય કરવા માંગે છે, તો પહેલા તેણે રવિવારે ઇંગ્લેન્ડ સામે રમાનારી મેચ જીતવી પડશે. આ મેચ માત્ર જીતવા માટે જ નહીં પરંતુ તેને મોટા માર્જિનથી પણ જીતવી પડશે. યુએસએને ઓછામાં ઓછા 160 રન બનાવવા પડશે. આ પછી ઈંગ્લેન્ડને ઓછામાં ઓછા 56 રનથી હારવું પડશે. આ સાથે તેના 2 પોઈન્ટ અને ઈંગ્લેન્ડ કરતા સારો નેટ રન રેટ હશે.
વેસ્ટ ઈન્ડિઝની હાર માટે પ્રાર્થના
જો કે, આ પછી યુએસએની ટીમ સીધી સેમિફાઇનલમાં પ્રવેશ કરી શકશે નહીં. તેણે અન્ય ટીમોના પ્રદર્શન પર પણ નિર્ભર રહેવું પડશે. યુએસએ ટીમે આશા રાખવી પડશે કે સાઉથ આફ્રિકા ઓછામાં ઓછા 91 રનના માર્જિનથી વેસ્ટ ઈન્ડિઝને હરાવશે. આનાથી વેસ્ટ ઈન્ડિઝનો નેટ રન રેટ યુએસએ કરતા નીચે આવશે. વેસ્ટ ઈન્ડિઝ, યુએસએ અને ઈંગ્લેન્ડ 2-2 પોઈન્ટ પર ટાઈ થયા બાદ સેમિફાઈનલ માટે ક્વોલિફાઈ થશે અને યુએસએની ટીમનો નેટ રન રેટ વધુ સારો છે.
સાઉથ આફ્રિકા પણ થઈ શકે છે બહાર
જો કે આવું થવું ખૂબ જ મુશ્કેલ છે, પરંતુ ક્રિકેટમાં બધું જ શક્ય છે, આવી સ્થિતિમાં એવું કહી શકાય કે જો યુએસએની ટીમ ચમત્કારિક આંકડો પાર કરે છે તો તે સેમિફાઇનલમાં પહોંચી શકે છે. ગ્રુપ 2માંથી 4 પોઈન્ટ મેળવનાર સાઉથ આફ્રિકાનું સેમીફાઈનલમાં પહોંચવું લગભગ નિશ્ચિત માનવામાં આવે છે. તેના 4 પોઈન્ટ છે. જો વેસ્ટ ઈન્ડિઝ અને ઈંગ્લેન્ડ પોતપોતાની મેચ મોટા માર્જિનથી જીતે અને સાઉથ આફ્રિકાને હારનો સામનો કરવો પડે તો તે પણ બહાર થઈ શકે છે.
