ટાટા ગ્રૂપે કર્યો રૂપિયાનો વરસાદ, રેકોર્ડ કિંમતે ખરીદ્યા 5 વર્ષના IPL રાઈટ્સ

• ટાટા ગ્રૂપ 2024-28 માટે રૂ. 2500 કરોડના રેકોર્ડ મૂલ્યના ટાઇટલ અધિકારોની માલિકી ધરાવશે
  
• ટાટા ગ્રૂપે છેલ્લી બે IPL સિઝનના ટાઇટલ રાઈટ્સ માટે રૂ. 670 કરોડ ચૂકવ્યા હતા
• આઈપીએલના ઈતિહાસમાં આ અત્યાર સુધીની સૌથી વધુ સ્પોન્સરશિપ રકમ છે

ભારતીય ક્રિકેટ કંટ્રોલ બોર્ડ (BCCI) એ શનિવારે ટાટા ગ્રુપને ઈન્ડિયન પ્રીમિયર લીગ (IPL) ના ટાઈટલ સ્પોન્સરશિપ અધિકારો પાંચ વર્ષ માટે આપવાની જાહેરાત કરી હતી. ટાટા ગ્રૂપે આ રીતે તેના ટાઇટલ સ્પોન્સરશિપ અધિકારો જાળવી રાખ્યા હતા. ટાટા ગ્રૂપ 2024-28 માટે રૂ. 2500 કરોડના રેકોર્ડ મૂલ્યના ટાઇટલ અધિકારોની માલિકી ધરાવશે. આઈપીએલના ઈતિહાસમાં આ અત્યાર સુધીની સૌથી વધુ સ્પોન્સરશિપ રકમ છે.

ટાટા ગ્રુપ પાસે અગાઉ 2022 અને 2023ની છેલ્લી બે સિઝન માટે IPLના ટાઇટલ સ્પોન્સરશિપ અધિકારો પણ હતા. ત્યારબાદ ચીનની સ્માર્ટફોન કંપની Vivoએ આ ડીલમાંથી ખસી જવાનો નિર્ણય લીધો હતો. ટાટા ગ્રૂપ મહિલા પ્રીમિયર લીગ (WPL)નું ટાઇટલ સ્પોન્સર પણ છે, જે 2023માં શરૂ કરવામાં આવી હતી. ટાટા ગ્રૂપે છેલ્લી બે IPL સિઝનના ટાઇટલ અધિકારો માટે સામૂહિક રીતે રૂ. 670 કરોડ ચૂકવ્યા હતા.

IPL-2024 માર્ચના ત્રીજા સપ્તાહથી શરૂ થવાની શક્યતા

આઈપીએલના ચેરમેન અરુણ સિંહ ધૂમલે કહ્યું કે ટાટા ગ્રુપની ક્રિકેટ અને રમત પ્રત્યેની પ્રતિબદ્ધતા ખરેખર પ્રશંસનીય છે. અમે સાથે મળીને નવી ઊંચાઈઓ સર કરવા અને ચાહકોને ઉત્તમ મનોરંજન પ્રદાન કરવા આતુર છીએ.” આ સાથે એમ પણ માહિતિ મળી છે કે IPL-2024 માર્ચના ત્રીજા સપ્તાહથી શરૂ થવાની શક્યતા છે.

આગામી 20 વર્ષમાં શું થશે?

આ લીગની બ્રાન્ડ વેલ્યુ 2008માં શરૂ થઈ ત્યારથી 433 ટકા વધી છે અને તેથી તેના મીડિયા અધિકારો માટે નાણાં ઠાલવી રહ્યાં છે. આઇપીએલના અગાઉના ટાઇટલ સ્પોન્સરશિપ રાઇટ્સ Vivo (2018-22) દ્વારા રૂ. 2199 કરોડમાં ખરીદ્યા હતા. ટાટાએ હવે આગામી પાંચ વર્ષ માટે IPL માટે 13.7 ટકાની વધારાની રકમ આપી છે. અધિકારીઓ હવે કહી રહ્યા છે કે આગામી 20 વર્ષમાં IPLના મીડિયા અધિકારો 50 મિલિયન ડોલરને પાર કરી જશે.