કાનપુરના ગ્રીન પાર્ક સ્ટેડિયમમાં રમાઈ રહેલી બે મેચોની ટેસ્ટ સિરીઝની બીજી મેચ રોમાંચક મોડ પર પહોંચી ગઈ છે. વરસાદના કારણે છેલ્લા બે દિવસથી એક પણ બોલ રમાઈ શક્યો ન હતો, પરંતુ ચોથા દિવસે સંપૂર્ણ રમત રમાઈ હતી, જેના કારણે હવે આ મેચમાં પરિણામની આશા છે.
મેચની સ્થિતિ
સોમવારે બાંગ્લાદેશ પ્રથમ દાવ 233 રનમાં ઓલઆઉટ થઈ ગઈ હતી, જેના જવાબમાં ભારતે આક્રમક રીતે 285/9 રન બનાવીને દાવ ડિકલેર કર્યો હતો. દિવસના અંત સુધીમાં, બાંગ્લાદેશે તેની બીજી ઇનિંગમાં 26/2નો સ્કોર કર્યો હતો અને તે ટીમ ઇન્ડિયાની પ્રથમ ઇનિંગની લીડથી હજુ 26 રન પાછળ હતી. ચોથા દિવસની રમતમાં કુલ 18 વિકેટ પડી હતી અને દિવસ દરમિયાન કુલ 437 રન થયા હતા.
મોમિનુલ હકની જબરદસ્ત ઇનિંગ
ચોથા દિવસે બાંગ્લાદેશે 107/3ના સ્કોરથી તેની ઇનિંગ રમવાની શરૂઆત કરી હતી, પરંતુ 112ના સ્કોર પર ચોથો ઝટકો લાગ્યો હતો અને 32 બોલમાં 11 રન બનાવીને જસપ્રિત બુમરાહના બોલને છોડવાનો પ્રયાસ કરતી વખતે મુશફિકુર રહીમ બોલ્ડ થયો હતો. લિટન દાસે કેટલાક સારા શોટ રમ્યા હતા પરંતુ મોટા શોટનો પ્રયાસ કરતી વખતે રોહિત શર્માના જબરદસ્ત કેચને કારણે તે 13 રન બનાવીને આઉટ થયો હતો.
શાકિબ અલ હસન પણ વધુ યોગદાન આપી શક્યો ન હતો અને 9 રન બનાવીને પેવેલિયન પરત ફર્યો હતો. જો કે, પડતી વિકેટો વચ્ચે, મોમિનુલ હકે શાનદાર બેટિંગ ચાલુ રાખી અને પછી તેની સદી ફટકારવામાં સફળ રહ્યો. મોમિનુલે 107 રનની અણનમ ઈનિંગ રમી હતી પરંતુ તેને કોઈ સાથ મળ્યો નહોતો. ભારત તરફથી જસપ્રીત બુમરાહે સૌથી વધુ ત્રણ વિકેટ લીધી હતી.
ભારતે બેટિંગમાં મચાવી ધમાલ
ભારતીય ઓપનિંગ બેટ્સમેન, યશસ્વી જયસ્વાલ અને રોહિત શર્માએ આવતાની સાથે જ તોફાની બેટિંગ શરૂ કરી હતી. જયસ્વાલ અને રોહિતે મળીને માત્ર 3 ઓવરમાં 51 રન બનાવ્યા હતા. રોહિત શર્મા 23 રન બનાવીને આઉટ થયો હતો, જ્યારે બીજી તરફ જયસ્વાલે માત્ર 31 બોલમાં પોતાની ફિફ્ટી પૂરી કરી હતી અને તેની ઈનિંગ્સ 72 રન પર સમાપ્ત થઈ ગઈ હતી. મેચમાં માત્ર એક જ દિવસ બાકી હોવાથી તમામ ભારતીય બેટ્સમેનો ઝડપી રન બનાવવાના ઈરાદા સાથે મેદાનમાં ઉતરી રહ્યા હતા. વિરાટ કોહલીએ 47 રન બનાવ્યા હતા અને કેએલ રાહુલે 68 રનની ઝડપી અને સંતુલિત ઇનિંગ રમીને ભારતને 285ના સ્કોર સુધી પહોંચાડવામાં મહત્વની ભૂમિકા ભજવી હતી. ભારતે 285 રન પર પોતાનો દાવ ડિકલેર કર્યો હતો.
