બાબર આઝમ અને કોહલી વચ્ચેની સરખામણીને લઈને પૂર્વ ક્રિકેટર આપ્યું મોટું નિવેદન

• બાબર આઝમ અંગે આકાશ ચોપરાનું નિવેદન
  
• કોહલીએ ત્રણેય ફોર્મેટમાં સાબિત કર્યો: હરભજન સિંહ
• બાબર આઝમની સફર હમણાં જ શરૂ થઈ: આકાશ ચોપરા

ભારતીય ટીમના દિગ્ગજ બેટ્સમેન વિરાટ કોહલી અને પાકિસ્તાનના કેપ્ટન બાબર આઝમ વચ્ચે ઘણીવાર સરખામણી થતી રહે છે. ઘણા દિગ્ગજો પણ માને છે કે વિરાટ કોહલી ઘણો આગળ છે અને બાબર આઝમે હજુ લાંબી મજલ કાપવાની છે. પૂર્વ ક્રિકેટર આકાશ ચોપરાના કહેવા પ્રમાણે, બાબર આઝમની સફર હમણાં જ શરૂ થઈ છે, જ્યારે વિરાટ કોહલીએ ઘણું બધું હાંસલ કર્યું છે.

કોહલી અને બાબરની સરખામણી

ક્રિકેટમાં વિરાટ કોહલી અને બાબર આઝમની સરખામણી ઘણી વખત થાય છે. પાકિસ્તાનના ઘણા દિગ્ગજો વિરાટ અને બાબર વચ્ચે સરખામણી કરે છે. ઘણા ભૂતપૂર્વ પાકિસ્તાની ક્રિકેટરો માને છે કે વિરાટ કોહલી એક વધુ સારો બેટ્સમેન છે કારણ કે તે ઘણા વર્ષોથી રમી રહ્યો છે અને તેણે તેની કારકિર્દીમાં ઘણું હાંસલ કર્યું છે. સાથે જ કેટલાક પૂર્વ ક્રિકેટરોએ પણ બાબર આઝમને કોહલી કરતા વધુ સારો બેટ્સમેન ગણાવ્યો છે.

બાબર અંગે આકાશ ચોપરાનું નિવેદન

ઓસ્ટ્રેલિયા સામેની વર્લ્ડકપ મેચમાં બાબર આઝમ જ્યારે સસ્તામાં આઉટ થયો હતો ત્યારે તેના પર ઘણા સવાલો ઉભા થયા હતા. ટીમને જ્યારે જરૂર હતી ત્યારે બાબર આઝમ મોટી ઇનિંગ્સ રમી શક્યો ન હતો. પૂર્વ ક્રિકેટર આકાશ ચોપરાએ પોતાની યુટ્યુબ ચેનલ પર વાતચીત દરમિયાન કહ્યું કે, આખી દુનિયા બાબર આઝમનું સન્માન કરે છે. પાકિસ્તાનના લોકો તેને કિંગ કહે છે. વધુમાં કહ્યું કે, બાબર આઝમ અને વિરાટ કોહલી વચ્ચે સરખામણી કરવામાં આવે તો બાબર આઝમ કોહલીની આસપાસ પણ નથી. હું તમને સત્ય કહી રહ્યો છું કારણ કે બાબર આઝમની સફર હમણાં જ શરૂ થઈ છે અને વિરાટ કોહલીએ ઘણું બધું હાંસલ કર્યું છે.

કોહલીએ ત્રણેય ફોર્મેટમાં સાબિત કર્યો

આ પહેલા ભારતીય ટીમના પૂર્વ સ્પિનર ​​હરભજન સિંહે પણ કહ્યું હતું કે બાબર આઝમ હજુ વિરાટ કોહલીના લેવલ સુધી પહોંચ્યો નથી. હરભજન સિંહના મતે કોહલીએ ત્રણેય ફોર્મેટમાં પોતાને સાબિત કરી દીધો છે, જ્યારે બાબર આઝમે હજુ પણ પોતાને સાબિત કરવાનું બાકી છે.