- રણજી ટ્રોફીની સેમિફાઇનલમાં વિદર્ભે મધ્યપ્રદેશને હરાવ્યું
- રણજી ટ્રોફીની ફાઇનલમાં વિદર્ભનો સામનો મુંબઈ સામે થશે
- યશ રાઠોડ તેના શાનદાર પ્રદર્શન બદલ 'પ્લેયર ઓફ ધ મેચ'
રણજી ટ્રોફી 2023-2024ની સેમિફાઇનલમાં વિદર્ભે મધ્યપ્રદેશને 62 રને હરાવ્યું હતું. આ મેચમાં વિદર્ભના કેપ્ટન અક્ષય વાડકરે ટોસ જીતીને પ્રથમ બેટિંગ કરવાનો નિર્ણય કર્યો હતો. પરંતુ વિદર્ભની ટીમ પ્રથમ દાવમાં માત્ર 170 રનમાં ઓલઆઉટ થઈ ગઈ હતી. આ પછી મધ્યપ્રદેશની ટીમે પ્રથમ દાવમાં 252 રન બનાવ્યા હતા. આ રીતે મધ્યપ્રદેશને પ્રથમ દાવમાં 82 રનની લીડ મળી હતી, પરંતુ તેમ છતાં ટીમ સેમિફાઇનલ મેચ હારી ગઈ હતી. યશ રાઠોડની શાનદાર ઇનિંગના આધારે વિદર્ભની ટીમે બીજી ઇનિંગમાં 402 રન બનાવ્યા હતા. આ રીતે મધ્યપ્રદેશને જીતવા માટે 321 રનનો ટાર્ગેટ મળ્યો હતો જેના જવાબમાં મધ્યપ્રદેશની ટીમ 258 રનમાં ઓલઆઉટ થઈ ગઈ હતી.
મધ્યપ્રદેશના બેટ્સમેનો ફ્લોપ રહ્યા હતા
મધ્યપ્રદેશના બેટ્સમેનો બીજા દાવમાં વિદર્ભ સામે સારું પ્રદર્શન કરી શક્યા ન હતા. વિદર્ભના બોલરોએ શાનદાર બોલિંગ કરી હતી. વિદર્ભ તરફથી અક્ષય વખારે અને યશ ઠાકુરે ત્રણ-ત્રણ વિકેટ લીધી હતી. આ સિવાય આદિત્ય ઠાકરે અને આદિત્ય સરવતેએ 2-2 વિકેટ લીધી હતી.
બીજા દાવમાં મધ્યપ્રદેશની શરૂઆત ખૂબ જ ખરાબ રહી હતી. જ્યારે હિમાંશુ મંત્રી માત્ર 8 રન બનાવીને પેવેલિયન પરત ફર્યો હતો. પરંતુ આ પછી યશ દુબે અને હર્ષ ગવલીએ રન બનાવવાની જવાબદારી લીધી. યશે 94 રન અને હર્ષે 67 રન બનાવ્યા હતા. પરંતુ આ બંને ખેલાડીઓ આઉટ થતાની સાથે જ મધ્યપ્રદેશની બેટિંગ વિખેરાઈ ગઈ હતી. સાગર સોલંકીએ 12 રન, વેંકટેશ અય્યરે 19 રન અને સરંશ જૈને 25 રન બનાવ્યા હતા. પરંતુ આ ખેલાડીઓ મધ્યપ્રદેશની ટીમને જીત સુધી લઈ જઈ શક્યા ન હતા.
યશ રાઠોડે શાનદાર ઇનિંગ રમી
વિદર્ભના બેટ્સમેનો ભલે પ્રથમ દાવમાં સારું પ્રદર્શન ન કરી શક્યા હોય પરંતુ બીજી ઇનિંગમાં જોરદાર પ્રદર્શન કર્યું હતું. વિદર્ભ માટે યશ રાઠોડે બીજી ઇનિંગમાં શાનદાર ઇનિંગ રમી હતી અને 141 રન બનાવ્યા હતા. તેના કારણે જ વિદર્ભની ટીમ મેચ જીતવામાં સફળ રહી હતી. તેના શાનદાર પ્રદર્શન માટે તેને 'પ્લેયર ઓફ ધ મેચ'નો એવોર્ડ આપવામાં આવ્યો હતો. યશ ઉપરાંત ધ્રુવ શૌરીએ 40 રન, અમન મોખંડે 59 રન, કરુણ નાયરે 38 રન અને કેપ્ટન અક્ષર વાડકરે 77 રનનું યોગદાન આપ્યું હતું. આ ખેલાડીઓના કારણે જ વિદર્ભની ટીમ 402 રનનો મોટો સ્કોર કરી શકી હતી.
વિદર્ભે ત્રીજી વખત ફાઇનલમાં જગ્યા બનાવી
રણજી ટ્રોફી 2023-2024ની ફાઇનલમાં વિદર્ભનો સામનો મુંબઈ સામે થશે. મુંબઈની ટીમે સેમીફાઈનલમાં તમિલનાડુને એક ઈનિંગ અને 70 રને હરાવ્યું છે. 1971 પછી આ પ્રથમ વખત છે જ્યારે એક જ રાજ્યની બે ટીમો રણજી ટ્રોફીની ફાઈનલ રમી રહી છે. વિદર્ભ આ પહેલા બે વખત ફાઇનલમાં જગ્યા બનાવી ચૂક્યું છે અને બંને વખત ટાઇટલ જીત્યું છે.
