ચેન્નાઇ સામે વિરાટ કોહલી રચશે ઇતિહાસ, આ કારનામું કરનાર પ્રથમ ભારતીય બનશે

• ઈન્ડિયન પ્રીમિયર લીગની 17મી સિઝન 22 માર્ચથી શરૂ થશે
  
• પહેલી જ મેચમાં રોયલ ચેલેન્જર્સ બેંગ્લોર ચેન્નાઈ સુપર કિંગ્સ સામે ટકરાશે
• વિરાટ કોહલી આ મેચમાં ઈતિહાસ રચી શકે છે

ઈન્ડિયન પ્રીમિયર લીગ (IPL 2024)ની 17મી સિઝન 22 માર્ચથી શરૂ થશે. ટુર્નામેન્ટની પહેલી જ મેચમાં રોયલ ચેલેન્જર્સ બેંગ્લોર (RCB) ચેન્નાઈ સુપર કિંગ્સ (CSK) સામે ટકરાશે. IPL 2024ની આ પ્રથમ મેચ શુક્રવારે ચેન્નાઈના એમએ ચિદમ્બરમ સ્ટેડિયમમાં રમાશે. વિરાટ કોહલી આ મેચમાં ઈતિહાસ રચી શકે છે. આ માટે તેમને 6 રનની જરૂર છે.

T20 ક્રિકેટમાં 12,000 રન પૂરા કરશે

વિરાટ કોહલી CSK સામે 6 રન બનાવ્યા બાદ T20 ક્રિકેટમાં 12,000 રન પૂરા કરશે. આ સાથે તે T20માં 12,000 રન બનાવનાર પ્રથમ ભારતીય બની જશે. વિરાટ કોહલીએ અત્યાર સુધી રમાયેલી 376 T20 મેચોની 359 ઇનિંગ્સમાં 11994 રન બનાવ્યા છે. આ દરમિયાન તેણે 91 અડધી સદી અને 8 સદી ફટકારી છે. તમને જણાવી દઈએ કે વિરાટ કોહલી બીજી વખત પિતા બન્યા બાદ ક્રિકેટમાં વાપસી કરશે. હાલમાં જ વિરાટ કોહલીની પત્ની અનુષ્કા શર્માએ એક પુત્રને જન્મ આપ્યો છે. દંપતીએ આ પુત્રનું નામ અકાય રાખ્યું છે.

T20માં સૌથી વધુ રન બનાવનાર ભારતીય

• વિરાટ કોહલી: 11994 રન
• રોહિત શર્મા: 11156 રન
• શિખર ધવન: 9645 રન
• સુરેશ રૈના: 8654 રન
• રોબિન ઉથપ્પા: 7272 રન

આમ કરનાર છઠ્ઠો બેટ્સમેન બની જશે

જો વિરાટ કોહલી CSK સામેની પ્રથમ મેચમાં 6 રન બનાવી લે છે તો તે T20 ક્રિકેટમાં 12,000 રન બનાવનાર છઠ્ઠો બેટ્સમેન બની જશે. વિરાટ કોહલી T20 ઈન્ટરનેશનલમાં સૌથી વધુ રન બનાવનાર બેટ્સમેન છે. તેણે 117 મેચની 109 ઇનિંગ્સમાં 4037 રન બનાવ્યા છે. આ સિવાય તે ઈન્ડિયન પ્રીમિયર લીગમાં સૌથી વધુ રન બનાવનાર બેટ્સમેન પણ છે. વિરાટે IPLની 237 મેચોની 229 ઇનિંગ્સમાં 7263 રન બનાવ્યા છે. લીગમાં 7000 રન બનાવનાર તે એકમાત્ર બેટ્સમેન છે.

T20માં સૌથી વધુ રન બનાવનાર બેટ્સમેન

• ક્રિસ ગેલ: 14562 રન
• શોએબ મલિક: 13360 રન
• કિરોન પોલાર્ડ: 12900 રન
• એલેક્સ હેલ્સ: 12319 રન
• ડેવિડ વોર્નર: 12065 રન
• વિરાટ કોહલી: 11994 રન