શુભમન ગિલ વનડેમાં શ્રેષ્ઠ અને ટેસ્ટમાં ફ્લોપ કેમ? આકાશ ચોપરાએ જણાવ્યું કારણ

• શુભમન ગિલ ટેસ્ટ ફોર્મેટમાં સંપૂર્ણ રીતે ફ્લોપ રહ્યો
  
• ગિલની ODIમાં 61 અને ટેસ્ટમાં માત્ર 31ની સરેરાશ
• ગિલની ટેસ્ટ ક્રિકેટમાં 19 મેચમાં 2 સદી અને 4 ફિફ્ટી

ભારત અને સાઉથ આફ્રિકા વચ્ચેની બે મેચની ટેસ્ટ સિરીઝની પ્રથમ મેચમાં શુભમન ગિલ સંપૂર્ણ રીતે ફ્લોપ રહ્યો હતો. સેન્ચુરિયનમાં રમાયેલી આ મેચની પ્રથમ ઇનિંગમાં શુભમને 2 રન બનાવ્યા હતા અને બીજી ઇનિંગમાં તે 26 રન બનાવી શક્યો હતો. તેના પ્રદર્શન બાદ ફરી એક સવાલ ચર્ચામાં આવ્યો છે કે શા માટે શુભમન ગિલ ટેસ્ટ ક્રિકેટમાં જે રીતે વન-ડેમાં પ્રદર્શન કરી શકતો નથી. હવે આ અંગે પૂર્વ ભારતીય ક્રિકેટર આકાશ ચોપરાએ પ્રતિક્રિયા આપી છે.

આકાશ ચોપરાએ કહ્યું, 'જ્યારે ભારતે ઓસ્ટ્રેલિયાનો પ્રવાસ કર્યો ત્યારે ગિલ ખૂબ જ અસરકારક હતો. તેને ભવિષ્યના ક્રિકેટર તરીકે જોવામાં આવતો હતો. તે ODI ક્રિકેટમાં શાનદાર રમે છે. આ તેનું ફેવરિટ ફોર્મેટ છે. T20માં પણ તેનું પ્રદર્શન સરેરાશ છે. પરંતુ ટેસ્ટ ક્રિકેટમાં, પછી ભલે તે ઈંગ્લેન્ડ હોય, વેસ્ટ ઈન્ડિઝ હોય, ન્યુઝીલેન્ડ હોય કે સાઉથ આફ્રિકા હોય, મને નથી લાગતું કે તેણે સારું ક્રિકેટ રમ્યું છે.

ટેસ્ટ ક્રિકેટમાં શા માટે ફ્લોપ?

આકાશ કહે છે, 'શુભમને પોતાના કરિયરની શરૂઆત ઓપનિંગ બેટ્સમેન તરીકે કરી હતી. પછી તે નંબર-3 પર રમ્યો છે. જ્યાં સુધી મને લાગે છે કે તે ટેસ્ટ ક્રિકેટમાં નંબર 4 પર રમવા માંગે છે. પરંતુ અત્યારે તેને રન બનાવવાની ખૂબ જ જરૂર છે. તેની બેટિંગમાં એક નાની ટેકનિકલ ખામી પણ છે જે તેને આ ફોર્મેટમાં પરેશાન કરી રહી છે. તે એક એવો ખેલાડી છે જે મોટે ભાગે પોતાના હાથ વડે રમવાનું પસંદ કરે છે. તે તેના પગ પર વધુ નિર્ભર નથી. બેટિંગની આ પદ્ધતિ સપાટ પિચો અને સફેદ બોલ પર રમાતી ક્રિકેટમાં બંધબેસે છે પરંતુ ટેસ્ટ ક્રિકેટમાં તે કામ કરતી નથી.

ODIમાં 61 અને ટેસ્ટમાં માત્ર 31ની સરેરાશ

ODIમાં શુભમન ગિલની બેટિંગ એવરેજ 61.37 છે, જ્યારે ટેસ્ટ ક્રિકેટમાં તે માત્ર 31.06ની એવરેજથી રન બનાવી શક્યો છે. અત્યાર સુધી તેની કારકિર્દીમાં ગીલે 44 વનડે મેચોમાં 6 સદી અને 13 ફિફ્ટીની મદદથી કુલ 2271 રન બનાવ્યા છે. બીજી તરફ ટેસ્ટ ક્રિકેટમાં તેણે 19 મેચમાં 2 સદી અને 4 ફિફ્ટી ફટકારીને 994 રન બનાવ્યા છે.