- વેસ્ટ ઈન્ડિઝ ક્રિકેટરો T20માં લાંબી સિક્સ માટે વિશ્વમાં જાણીતા છે
- ટેસ્ટ મેચથી દૂર રહેવા બાબતે આન્દ્રે રસેલે કર્યો ખુલાસો
- ટેસ્ટ ક્રિકેટ રમવામાં રસ નથી અને તેની પાછળ પૈસાનો કોઈ મુદ્દો નથી
વેસ્ટ ઈન્ડિઝના મોટા ભાગના ખેલાડીઓ મોટી-મોટી T20 ક્રિકેટ લીગમાં તેમની વિસ્ફોટક ઈનિંગ્સને કારણે ચર્ચામાં રહે છે. આ ખેલાડીઓ ટી-20 ક્રિકેટમાં તેમની લાંબી સિક્સ, વિકેટ લેવા અને અલગ-અલગ પ્રકારની ઉજવણી કરવાની રીતોને કારણે ખૂબ જ પસંદ કરવામાં આવે છે. પરંતુ બીજી તરફ વેસ્ટ ઈન્ડિઝ ટીમનો ટેસ્ટ ક્રિકેટ ગ્રાફ સતત નીચે જઈ રહ્યો છે. આ અંગે તોફાની બેટ્સમેને પોતાની પ્રતિક્રિયા આપી છે.
વેસ્ટ ઈન્ડિઝ ક્રિકેટ ટીમના ખેલાડીઓ ટેસ્ટ મેચમાં કેમ ફ્લોપ થાય છે?
વેસ્ટ ઈન્ડિઝ ક્રિકેટ ટીમના ખેલાડીઓ ટી-20 ક્રિકેટમાં ધૂમ મચાવતા જોવા મળે છે, પરંતુ ટેસ્ટ મેચમાં તેઓ ફ્લોપ કેમ થાય છે? આ પ્રશ્ન સામાન્ય રીતે ક્રિકેટ ચાહકોના મનમાં ઉદભવે છે. લોકો માને છે કે તેની પાછળ પ્રસિદ્ધિ અને પૈસા સૌથી મોટું કારણ છે. પરંતુ વેસ્ટ ઈન્ડિઝ ક્રિકેટ ટીમના દિગ્ગજ ઓલરાઉન્ડર આન્દ્રે રસેલે આ અંગે પોતાની પ્રતિક્રિયા આપી છે. આન્દ્રે રસેલે ખુલાસો કર્યો છે કે, એવું કેમ થઈ રહ્યું છે કે વેસ્ટ ઈન્ડિઝના ક્રિકેટરો ટેસ્ટ મેચને બદલે માત્ર T20 ક્રિકેટ પર ધ્યાન આપે છે.
શું કહ્યું આન્દ્રે રસેલે?
વેસ્ટ ઈન્ડિઝના દિગ્ગજ ઓલરાઉન્ડર આન્દ્રે રસેલે આ પ્રશ્નના જવાબમાં કહ્યું કે, યુવાન ક્રિકેટરોને હવે ટેસ્ટ ક્રિકેટ રમવામાં રસ નથી અને તેની પાછળ પૈસાનો કોઈ મુદ્દો નથી. વેસ્ટ ઈન્ડિઝના અન્ય બેટ્સમેનોને જોઈને હું હંમેશા ઉત્સાહિત રહું છું. ખાસ કરીને જ્યારે તેઓ સતત બાઉન્ડ્રી ફટકારતા હોય છે. જ્યાં સુધી તમે તમારા દેશની બહારના કરારો સાથે સારું પ્રદર્શન કરી શકો છો. મને લાગે છે કે તેઓ તે તકનો લાભ લેશે, પરંતુ દરેક મોટા મંચ પર રમવા માંગે છે. તેથી જો ટેસ્ટ ક્રિકેટમાં મોટું મંચ આવે છે, તો હું જાણું છું કે યુવા ખેલાડીઓ રમવામાં ખુશ થશે. મને નથી લાગતું કે તેઓ પૈસા કે તેના જેવી અન્ય કોઈ વસ્તુ વિશે વિચારે છે.
ટેસ્ટ ક્રિકેટથી કેમ દૂર રહ્યો રસેલ?
આન્દ્રે રસેલ પોતે પણ વેસ્ટ ઈન્ડિઝ માટે ટેસ્ટ મેચ નથી રમી રહ્યો. ગયા વર્ષે ડિસેમ્બર મહિનામાં વેસ્ટ ઈન્ડિઝના સ્ટાર ખેલાડીઓ નિકોલસ પૂરન, જેસન હોલ્ડર અને કાયલ મેયર્સે પણ ક્રિકેટ વેસ્ટ ઈન્ડિઝના સેન્ટ્રલ કોન્ટ્રાક્ટને ફગાવી દીધો હતો. જો કે, આ ખેલાડીઓએ પોતાને T20 મેચ માટે ઉપલબ્ધ જાહેર કર્યા હતા. આન્દ્રે રસેલે આના પર કહ્યું કે, પૈસા કોઈ મુદ્દો નથી. તમે કરારથી બંધાયેલા છો કે નહીં તે અલગ-અલગ બાબત છે. પરંતુ વિશ્વભરમાં રમાતી T20 લીગની સંખ્યા યુવા ખેલાડીઓને ટેસ્ટ ક્રિકેટથી દૂર કરી રહી છે.
રસેલે માત્ર 1 ટેસ્ટ મેચ રમી
વેસ્ટ ઈન્ડિઝના ખેલાડીઓ સતત ટેસ્ટ મેચોથી દૂર રહે છે. આન્દ્રે રસેલે પોતાની કારકિર્દીમાં અત્યાર સુધી માત્ર 1 ટેસ્ટ મેચ રમી છે. આમાં તે ખરાબ રીતે ફ્લોપ રહ્યો અને માત્ર 2 રન બનાવી શક્યો હતો. આન્દ્રે રસેલ ઉપરાંત નિકોલસ પૂરન, પોવેલ અને કિરોન પોલાર્ડ જેવા વિસ્ફોટક બેટ્સમેન છે જેમણે અત્યાર સુધી પોતાની કારકિર્દીમાં એક પણ ટેસ્ટ મેચ રમી નથી.
