- વ્હાઈટ હાઉસે આતંકી હુમલા અંગે સત્તાવાર સંપર્ક ન હોવાનું જણાવ્યું
- રશિયાની રાજધાની મૉસ્કોમાં આતંકી હુમલો થયો
- આતંકી હુમલામાં 70 લોકોનાં મોત, 145થી વધુ ઈજાગ્રસ્ત
રશિયાની રાજધાની મૉસ્કોમાં થયેલા આતંકવાદી હુમલાની ચારેબાજુ આકરી ટીકા થઈ રહી છે. ત્યારે અમેરિકાએ પુતિનને ફોન કરવાની જો બાઈડેનની કોઈ યોજના નથી. વ્હાઇટ હાઉસની રાષ્ટ્રીય સુરક્ષા પરિષદના પ્રવક્તાએ જણાવ્યું હતું કે મૉસ્કો નજીક ક્રોકસ સિટી હોલમાં થયેલા આતંકવાદી હુમલા બાદ યુએસ પ્રમુખ જો બાઈડેન અને રશિયન રાષ્ટ્રપતિ વ્લાદિમીર પુતિન વચ્ચે કોઈ ફોન શેડ્યૂલ નથી. જ્યારે પ્રવક્તાને પૂછવામાં આવ્યું કે શું આતંકવાદી હુમલાના પગલે બાઈડેન અને પુતિન વચ્ચે કોઈ કોલની યોજના છે, તો તેમણે જવાબ આપ્યો - ના. વ્હાઇટ હાઉસે જણાવ્યું હતું કે તે હુમલા અંગે યુએસ અને રશિયન અધિકારીઓ વચ્ચેના કોઈપણ સંપર્ક વિશે જાણતું નથી.
હુમલામાં અત્યાર સુધીમાં 70ના મોત, ISISએ જવાબદારી સ્વીકારી
આતંકવાદી સંગઠન ઈસ્લામિક સ્ટેટ ઓફ સીરિયા એન્ડ ઈરાક (ISIS)એ શુક્રવારે મૉસ્કોના ક્રોકસ કોન્સર્ટ હોલમાં ગોળીબાર અને બોમ્બ વિસ્ફોટની જવાબદારી લીધી છે. આ ભયાનક આતંકવાદી હુમલામાં ઓછામાં ઓછા 70 લોકોના મોત થયા હતા અને 145થી વધુ લોકો ઘાયલ થયા હતા. ISISએ તેની ટેલિગ્રામ ચેનલ પર એક નિવેદન જારી કરીને કહ્યું કે, 'અમારા લડવૈયાઓએ રશિયાની રાજધાની મોસ્કોની બહાર સ્થિત ક્રોકસ કોન્સર્ટ હોલ પર હુમલો કર્યો.' સંગઠનના નિવેદનમાં એમ પણ કહેવામાં આવ્યું છે કે હુમલાખોરો 'પોતાના ઠેકાણાઓ પર સુરક્ષિત રીતે પાછા આવી ચુક્યા છે.
આતંકી હુમલા સમયે છ હજારથી વધુ લોકો હાજર હતા
જ્યારે હુમલો થયો ત્યારે ક્રોકસ સિટી હોલમાં સોવિયેત યુગના પ્રખ્યાત મ્યુઝિક બેન્ડ 'પિકનિક'નું પરફોર્મન્સ ચાલી રહ્યું હતું. આ મ્યુઝિક કોન્સર્ટમાં 6200 લોકો હાજર રહ્યા હતા. રશિયન અધિકારીઓએ કહ્યું કે અમે આ આતંકવાદી હુમલાની તપાસ કરી રહ્યા છીએ અને રાષ્ટ્રપતિ વ્લાદિમીર પુતિનને સતત અપડેટ કરવામાં આવી રહ્યા છે. રશિયાના વિદેશ મંત્રાલયે આ આતંકવાદી હુમલાનું વર્ણન કર્યું છે અને આંતરરાષ્ટ્રીય સમુદાયને આ ઘૃણાસ્પદ અપરાધની નિંદા કરવાની અપીલ કરી છે. આ આતંકવાદી હુમલો એવા સમયે થયો છે જ્યારે વ્લાદિમીર પુતિને તાજેતરમાં પૂર્ણ થયેલી રાષ્ટ્રપતિની ચૂંટણીમાં મોટી જીત નોંધાવી છે અને રશિયાના રાષ્ટ્રપતિ તરીકે સતત પાંચમી મુદત સંભાળવા જઈ રહ્યા છે. બીજી તરફ રશિયા છેલ્લા બે વર્ષથી યુક્રેન સાથે યુદ્ધ લડી રહ્યું છે.
તાજેતરમાં રશિયા અને અમેરિકા વચ્ચેના સંબંધો કેવા છે?
યુક્રેન યુદ્ધ બાદ અમેરિકા અને રશિયા ઘણીવાર સામસામે જોવા મળતા હતા. જે બાદ એકબીજા સામે પગલાં લેવાનો તબક્કો પણ શરૂ થયો હતો. ગયા વર્ષે રશિયાએ બે અમેરિકન રાજદ્વારીઓને હાંકી કાઢ્યા હતા અને તેમને સાત દિવસમાં દેશ છોડવાનો આદેશ આપ્યો હતો. જે બાદ ઓક્ટોબરમાં અમેરિકાએ પણ જવાબી કાર્યવાહી કરીને બે રશિયન રાજદ્વારીઓને હાંકી કાઢ્યા હતા અને તેમને અમેરિકા છોડવાનો આદેશ આપ્યો હતો.
