American President : જો બાઇડેનનો યુ-ટર્ન, પુત્રને તમામ ગુનામાંથી દોષમુક્ત કર્યો

અમેરિકી રાષ્ટ્રપતિ જો બાઇડેન ગેરકાયદેસર બંદૂક રાખવા અને આવકવેરા ચોરીના કેસમાં તેમના પુત્રને માફ કરી દીધો છે. રાષ્ટ્રપતિ બાઇડેને 1 ડિસેમ્બરે એક નિવેદન જાહેર કરીને આ અંગેની માહિતી આપી છે. જો કે, બિડેન દ્વારા લેવામાં આવેલા આ નિર્ણયને તેમના અગાઉના વચન પર યુ-ટર્ન કહેવામાં આવી રહ્યો છે. જેમાં તેમણે કહ્યું હતું કે તેઓ તેમના પ્રમુખપદની સત્તાનો ઉપયોગ તેમના પરિવારના લાભ માટે નહીં કરે.

જો બાઇડેને સત્તાવાર નિવેદન જાહેર કર્યું

જો બાઇડેને 1 ડિસેમ્બરે સત્તાવાર નિવેદન જાહેર કરીને આ માહિતી આપી હતી. તેમના નિવેદનમાં, રાષ્ટ્રપતિ જો બાઇડેને કહ્યું, "આજે, મેં મારા પુત્ર હન્ટર માટે માફી પર હસ્તાક્ષર કર્યા છે. મેં જ્યારથી અમેરિકી રાષ્ટ્રપતિ પદ સંભાળ્યું છે ત્યારથી મેં કહ્યું હતું કે ન્યાય વિભાગ દ્વારા લેવામાં આવતા નિર્ણયોમાં હું દખલ નહીં કરીશ અને મેં આ વચન પાળ્યું છે. પરંતુ મેં જોયું કે મારા પુત્રને અન્યાયી રીતે નિશાન બનાવવામાં આવી રહ્યો છે અને તેની સામે કાર્યવાહી કરવામાં આવી રહી છે. તેમના પર લગાવવામાં આવેલા આરોપો રાજકીય રીતે પ્રેરિત હતા જેથી તેઓ મારા પર હુમલો કરી શકે અને મારી ચૂંટણી પ્રક્રિયાનો વિરોધ કરી શકે.

જો બાઇડેને વધુમાં કહ્યું, “મેં મારી સમગ્ર કારકિર્દી દરમિયાન એક સરળ સિદ્ધાંતનું પાલન કર્યું છે

જો બાઇડેને વધુમાં કહ્યું, “મેં મારી સમગ્ર કારકિર્દી દરમિયાન એક સરળ સિદ્ધાંતનું પાલન કર્યું છે. માત્ર અમેરિકન લોકોને સત્ય કહો. એ વાત સાચી છે કે મને ન્યાય પ્રણાલીમાં પૂરો વિશ્વાસ છે, પરંતુ જ્યારે મેં તેની સાથે સંઘર્ષ કર્યો ત્યારે મને લાગ્યું કે આ પ્રક્રિયાને પણ રાજકારણથી ચેપ લાગ્યો છે. મને આશા છે કે અમેરિકન લોકો સમજશે કે એક પિતા અને રાષ્ટ્રપતિએ આવો નિર્ણય કેમ લીધો.

બાઇડેનના પુત્ર હન્ટર સામે શું આરોપ છે?

અમેરિકી રાષ્ટ્રપતિ જો બાઇડેનના પુત્ર જોસેફ હન્ટર બાઇડેન પર કરચોરી, ગેરકાયદેસર હથિયાર રાખવા, સરકારી નાણાનો દુરુપયોગ અને ખોટી જુબાની આપવાનો આરોપ છે. ઉલ્લેખનીય છે કે હંટરે ડેલવેર કોર્ટમાં કરચોરી અને ગેરકાયદેસર હથિયાર રાખવાની કબૂલાત કરી હતી.