- 1984નાં શીખ રમખાણોને ગણાવ્યું સુનિયોજિત ષડયંત્ર
- આરએસએસ પર પ્રતિબંધ મુકવા કરી અપીલ
- નિજ્જરની હત્યાને કેનેડાની સંપ્રભુતા પર હુમલો ગણાવી
કેનેડાની નેશનલ ડેમોક્રેટિક પાર્ટીનાં નેતા અને વડાપ્રધાન જસ્ટિન ટ્રુડોની સરકારને ટેકો આપતા શીખ નેતા જગમીત સિંહે ફરી એકવાર વિવાદાસ્પદ ટ્વીટ કર્યું છે. જગમીતે પોતાના ટ્વીટમાં શીખ રમખાણોનો ઉલ્લેખ કર્યો છે અને આ રમખાણોને રાષ્ટ્રીય સ્વયંસેવક સંઘ સાથે જોડ્યા છે.
શીખ રમખાણો પાછળ આરએસએસનો હાથ
કેનેડાની નેશનલ ડેમોક્રેટિક પાર્ટીનાં નેતા અને વડાપ્રધાન જસ્ટિન ટ્રુડોના નજીકના જગમીત સિંહે 1984ના શીખ રમખાણો પર ટ્વિટ કર્યું છે. પોતાના ટ્વીટમાં જગમીતે રમખાણોને શીખ નરસંહાર ગણાવ્યા છે. આ સાથે તેણે કહ્યું છે કે રમખાણો પાછળ આરએસએસનો હાથ હતો. સાથે જ તેમણે ટ્રુડો પાસે માંગ કરી છે કે કેનેડામાં RSS સાથે જોડાયેલી તમામ શાખાઓ પર તાત્કાલિક પ્રતિબંધ લગાવવો જોઈએ. જગમીત સિંહ એવો નેતા છે જે ખુલ્લેઆમ ખાલિસ્તાનનું સમર્થન કરે છે. ખાલિસ્તાની આતંકવાદી હંમેશા કહેતા આવ્યા છે કે હરદીપ સિંહ નિજ્જરની હત્યામાં ભારતનો હાથ હતો.
નિજ્જરની હત્યા પાછળ ભારતીય એજન્ટો સામેલ
પોતાના ટ્વિટમાં જગમીતે ટ્વીટમાં લખ્યું છે કે જે રીતે તેમની પાર્ટીએ શીખ રમખાણોને નરસંહાર તરીકે માન્યતા આપી છે તે જ રીતે વડાપ્રધાન જસ્ટિન ટ્રુડોની લિબરલ સરકારે પણ આવો જ નિર્ણય લેવો જોઈએ. તેણે જણાવ્યું છે કે સરકાર દ્વારા શરૂ કરાયેલા અભિયાનમાં સુનિયોજિત ષડયંત્રના ભાગરૂપે ભારતમાં હજારો શીખોની હત્યા કરવામાં આવી હતી. જગમીતના કહેવા પ્રમાણે આ વર્ષે કેનેડાને ખબર પડી કે નિજ્જરની હત્યામાં ભારતીય એજન્ટો સામેલ છે. આવી સ્થિતિમાં ઉપચાર અને સમાધાન માટેના પ્રયત્નોને પ્રાથમિકતા આપવી જોઈએ. આ પછી તેણે લખ્યું હતું કે 'કેનેડિયન એનડીપીએ 1984ને શીખ નરસંહાર તરીકે માન્યતા આપી છે અને આરએસએસ અને તેના કેનેડિયન સહયોગીઓ પર કેનેડામાં પ્રતિબંધ મૂકવાની અપીલ કરી છે.'
ભારતીય મીડિયા પર આક્ષેપ
18 સપ્ટેમ્બરના રોજ જ્યારે ટ્રુડોએ દેશની સંસદમાં નિજ્જરની હત્યામાં ભારતીય એજન્ટોની સંડોવણી વિશે વાત કરી ત્યારથી જગમીત આક્રમક વલણ અપનાવી રહ્યા છે. ગત મહિને તેણે એમ પણ કહ્યું હતું કે દેશમાં રાષ્ટ્રીય ચૂંટણીમાં ભારતની દખલગીરીની તપાસ થવી જોઈએ. તેણે ભારત પર મીડિયાનો ઉપયોગ કરીને શીખોને ઉશ્કેરવા અને તેમનું ધ્યાન હટાવવાનો આરોપ લગાવ્યો હતો. ત્યાર બાદ જગમીતે ટ્રુડોને ભારત સરકારને તપાસમાં સામેલ કરવાની અપીલ કરી હતી. જગમીતે કહ્યું હતું કે ''ટ્રુડોએ ભારતીય મીડિયાને બિલકુલ સાંભળવું જોઈએ નહીં કારણ કે તે ખોટા નિવેદનો દ્વારા સમુદાયને ભડકાવવાનો પ્રયાસ કરી રહ્યું છે.'' જગમીતે કહ્યું હતું કે ''નિજ્જરની હત્યા બાદ ભારત સરકારે કેનેડાની સંપ્રભુતા પર હુમલો કર્યો છે.''
ખાલિસ્તાનનો મોટો સમર્થક
જગમીત ખાલિસ્તાનીઓનો મોટો સમર્થક માનવામાં આવે છે. ખાલિસ્તાની સમર્થકોને તેની પાર્ટીમાં સ્થાન મળ્યું છે. એવું કહેવાય છે કે તેણે તેના સમર્થકોની મોટી સભ્યપદની ભરતી કરીને NDPનું નેતૃત્વ મેળવ્યું હતું. ટ્રુડોની લિબરલ પાર્ટી રાષ્ટ્રીય ચૂંટણીમાં માત્ર 157 બેઠકો મેળવી શકી હતી. તેઓ 338 સાંસદો સાથે હાઉસ ઓફ કોમન્સમાં સરકાર બનાવવા માટે જરૂરી બહુમતી મેળવવામાં નિષ્ફળ રહ્યા હતા. ત્યારબાદ જગમીત સિંહની ન્યૂ ડેમોક્રેટિક પાર્ટીએ ટ્રુડોને સમર્થન આપ્યું અને તેમની સરકાર બની હતી. જગમીતની પાર્ટીને 24 બેઠકો મળી હતી.
