ખાલિસ્તાની આતંકવાદી નિજ્જર હત્યા કેસ પર કેનેડાના પીએમએ શું નથી કહ્યું. જસ્ટિન ટ્રુડોએ આ મુદ્દે ભારત સાથેના સંબંધો બગાડવામાં કોઈ કસર છોડી નથી. ભારતીય રાજદ્વારીઓ પર ગંભીર આક્ષેપો કર્યા. ટ્રુડોએ આ બધું કર્યા પછી હવે કેનેડાના પોલીસ કમિશનર કહી રહ્યા છે કે આ હત્યામાં ભારતની સંડોવણીના કોઈ પુરાવા નથી. કમિશનરનું નિવેદન આશ્ચર્યજનક છે કારણ કે, તેમનું નિવેદન ટ્રુડોના તે નિવેદનને સંપૂર્ણપણે નકારી કાઢે છે જેમાં કેનેડાના પીએમએ ભારત સરકાર પર સીધો આરોપ લગાવ્યો હતો.
નિજ્જર કેસને લઈ પોલીસ કમિશનરે આપ્યું નિવેદન
ખાલિસ્તાની આતંકવાદી હરદીપ સિંહ નિજ્જરની ગયા વર્ષે જૂનમાં કેનેડાના વેનકુવરમાં હત્યા કરવામાં આવી હતી. નિજ્જરને ગુરુદ્વારાની બહાર ગોળી મારી દેવામાં આવી હતી. આ મામલો ભારત અને કેનેડા વચ્ચેના ડિપ્લમૅટિક મડાગાંઠ બદલાઈ ગયો છે. હવે રોયલ કેનેડિયન માઉન્ટેડ પોલીસ (RCMP)ના કમિશનર માઈક ડુહેમે કેનેડાની મીડિયાને આ મામલે મોટું નિવેદન આપ્યું છે.
હાઈ કમિશનર પર કેનેડાએ લગાવ્યો હતો આરોપ
ડ્યૂહેમનું નિવેદન ટ્રુડોના આરોપો સાથે બિલકુલ મેળ ખાતું નથી. 14 ઓક્ટોબરે કેનેડાના અધિકારીઓએ આ મામલે એક પ્રેસ કોન્ફરન્સ યોજી હતી, જેમાં આરોપ લગાવવામાં આવ્યો હતો કે તેમને નિજ્જરની હત્યામાં ભારતીય એજન્ટોનો હાથ હોવાના મજબૂત પુરાવા મળ્યા છે. RCMPએ કહ્યું હતું કે, ભારતીય એજન્ટો માત્ર ટાર્ગેટ કિલિંગ પાછળ જ નથી, પરંતુ કેનેડામાં સાઉથ એશિયન ઇમિગ્રન્ટ્સને જબરદસ્તી આપવા અને ધમકાવવામાં પણ સામેલ હતા. ભારતનો ગુસ્સો ત્યારે ફાટી નીકળ્યો જ્યારે કેનેડાએ ભારતના હાઈ કમિશનર સંજય વર્માને ટાર્ગેટ કરવાનું શરૂ કર્યું. જો કે, ભારતીય હાઈ કમિશનરે સ્પષ્ટ કર્યું હતું કે કેનેડા ખોટા અને પાયાવિહોણા આરોપો લગાવી રહ્યું છે. બાદમાં ભારતે કેનેડામાંથી હાઈ કમિશનર સહિત 6 રાજદ્વારીઓને પાછા બોલાવ્યા હતા.
કેનેડિયન પોલીસે આપ્યું વિરોધાભાસી નિવેદન
તાજેતરમાં જ્યારે કેનેડિયન મીડિયાએ ડુહેમને પૂછ્યું કે, શું નિજ્જર હત્યા કેસમાં ભારતની સંડોવણીની તપાસ કરવામાં આવી રહી છે, તો તેણે કહ્યું કે, 'અમે ઘણી તપાસ કરી રહ્યા છીએ. અમે સંકેતો અને પુરાવાના આધારે વાત કરીએ છીએ. ક્યારેક તમને ખબર નથી હોતી કે કેસ તમને કઈ દિશામાં લઈ જઈ રહ્યો છે. જ્યારે કેસ શરૂ થાય છે, ત્યારે ફાઇલમાં કંઈપણ બહાર આવી શકે છે. તમે ક્યારેય જાણતા નથી કે ફાઇલ તમને ક્યાં લઈ જશે. કેટલીક ફાઈલો ભારત સરકાર પાસે લઈ જઈ શકાય છે. અન્ય ફાઈલો ભારત સરકારમાં લઈ જઈ શકાતી નથી.
હાલમાં કંઈ કહી શકતું નથી: કેનેડિયન પોલીસ
કેનેડિયન પોલીસના આ વિરોધાભાસી વલણને કારણે હવે તેમની વાતની વિશ્વસનિયતા પર શંકાઓ વ્યક્ત કરવામાં આવી રહી છે. ઉલ્લેખનીય છે કે, આ પહેલા RCMPએ સૂચવ્યું હતું કે, તેમની પાસે ભારતની સંડોવણીને લઈને પુરાવા છે અને હવે કેનેડિયન પોલીસ કહી રહી છે કે તેઓ હાલ પુરાવા અંગે સ્પષ્ટપણે કંઈ કહી શકે તેમ નથી.
ગુરુદ્વારાના પાર્કિંગમાં નિજ્જરને મારવામાં આવી હતી ગોળી
હરદીપ સિંહ નિજ્જર ભારતીય મૂળના કેનેડિયન શીખ અલગતાવાદી નેતા હતા. તે ખાલિસ્તાન ચળવળ સાથે સંકળાયેલો હતો. 18 જૂન 2023ના રોજ બ્રિટિશ કોલંબિયામાં ગુરુદ્વારાના પાર્કિંગમાં નિજ્જરની ગોળી મારીને હત્યા કરવામાં આવી હતી. શીખ સંગઠનો નિજ્જરને માનવાધિકાર કાર્યકર્તા તરીકે જોતા હતા, તેમ છતાં ભારત સરકાર દ્વારા તેના પર ગુનેગાર અને ખાલિસ્તાન ટાઈગર ફોર્સ સાથે સંકળાયેલા આતંકવાદી હોવાનો આરોપ મૂકવામાં આવ્યો હતો અને તેની ધરપકડ માટે સતત માગ કરવામાં આવતી હતી. નિજ્જર અને તેના સમર્થકો આ આરોપોને નકારી રહ્યા હતા. કેનેડામાં નિજ્જરે 2019માં લોકપ્રિયતા મેળવી, જ્યારે તેણે બ્રિટિશ કોલમ્બિયાના સરેમાં ગુરુ નાનક શીખ ગુરુદ્વારાનું નેતૃત્વ સંભાળ્યું અને શીખ અલગતાવાદના અવાજના સમર્થક બન્યા.
