અમેરિકા અને ચીન એકબીજા વિરુદ્ધ રણનીતિક નિર્ણયો લેવાથી કયારેય પણ નથી અચકાતા. અમેરિકાના સૌથી મોટા બે દુશ્મન દેશ રશિયા અને ઈરાનની સાથે ઘરોબો વધતો જતા ગત કેટલાક વર્ષોથી અમેરિકાએ પણ તાઈવાનને ટેકો આપી ચીનનો ક્રોધ વ્હોરી લીધો છે. ચીને તાઈવાનના મુદ્દાઓમાં દખલગીરીનો આરોપ લગાવતા અમેરિકાની ટીકા કરી છે. અમેરિકી વિદેશ વિભાગે તાઈવાન માટે બે બિલિયન ડોલરના હથિયાર વેચાણના પેકેજને મંજૂરી આપી છે. જેને લઈ શી જિનપિંગ સરકાર ખૂબ જ નારાજ છે.
ચીન તાઈવાનનો પોતાનો હિસ્સો માને છે અને તાઈવાન સાથે બીજા દેશોને ડિપ્લોમેટિક અથવા કોઈપણ પ્રકારના સંબંધ વધારવાના પ્રયાસને ચીન પોતાના સાર્વભૌમત્વ પર હુમલો ગણે છે. તાજેતરમાં ચીનની સેનાએ તાઈવાનને ચારેબાજુથી ઘેરી મિલિટ્રી ડ્રીલ યોજી હતી. ચીનના આ પગલાંને ચેતવણી તરીકે તાઈવાને જોયું અને ત્યાંના સમર્થકોએ પણ.
શસ્ત્રોના સોદાથી ચિંતિત છે ચીન
હવે અમેરિકી સરકારના એક પગલાંથી ચીનની ચિંતા વધી ગઈ છે. આ શુક્રવારે, યુએસ સ્ટેટ ડિપાર્ટમેન્ટે એશિયા પેસિફિક ક્ષેત્રમાં ચીનની વધતી જતી સૈન્ય શક્તિનો સામનો કરવા માટે તાઇવાન માટે બે બિલિયન ડોલર શસ્ત્ર વેચાણ પેકેજને મંજૂરી આપી હતી, જેમાં સપાટીથી હવામાં મિસાઇલ સિસ્ટમ્સ અને રડારનો સમાવેશ થાય છે .
જો કે આ ડીલને હજુ સુધી અમેરિકી કોંગ્રેસ દ્વારા મંજૂરી અપાઈ નથી. પરંતુ માનવામાં આવે છે કે, કોંગ્રેસ ટૂંક સમયમાં તેને મંજૂરી આપી શકે છે. આ હથિયારો તાઈવાનને યુએસ એરફોર્સ દ્વારા સપ્લાય કરવામાં આવશે.
ચીને તાઈવાનને લઈને શપથ લીધા!
તાઈવાનને અમેરિકન શસ્ત્રોના વેચાણને લઈને ચીને બાઈડેન તંત્રની ટીકા કરી છે. તાઈવાન પર તેના સાર્વભૌમત્વનો દાવો કરતા ચીને અમેરિકાના આ પ્રયાસો સામે 'તમામ જરૂરી પગલાં' લેવાની પ્રતિજ્ઞા લીધી છે.
તાઈવાનનો મુદ્દો ચીન માટે 'રેડ લાઈન' છે
ચીન તાઈવાનના મુદ્દાને સતત 'રેડ લાઈન' ગણાવી રહ્યું છે અને કહે છે કે, તેને કોઈપણ કિંમતે પાર ન કરવી જોઈએ. તાજેતરમાં ચીને તાઈવાનને પોતાના કાબૂમાં લાવવા માટે કોઈપણ પ્રકારના બળનો ઉપયોગ કરવાનો ઈનકાર કર્યો છે.
ચીન તાઈવાનને લઈને આક્રમક છે
તાજેતરના સમયમાં, ચીને તાઈવાનની આસપાસ દરરોજ તેની હાજરી અનુભવી છે. આ મહિને ચીનની ત્રણ સેનાઓ દ્વારા કરવામાં આવેલી સૈન્ય કવાયત દરમિયાન, તેના ફાઇટર પ્લેન, ડ્રોન અને યુદ્ધ જહાજો આ વ્યૂહાત્મક ટાપુને ચારે બાજુથી ઘેરાયેલા જોવા મળ્યા હતા. આ મહિનાની શરૂઆતમાં, તાઈવાને એક જ દિવસમાં 153 ચીની વિમાનોની હાજરી નોંધી હતી.
'વન ચાઇના' નીતિથી પીછેહઠ કરવાનો આરોપ
અમેરિકા અને તાઈવાન વચ્ચે ભલે કોઈપણ પ્રકારના રાજદ્વારી સંબંધો ન હોય, પરંતુ અમેરિકા ચીન વિરુદ્ધ તાઈપેને સતત સમર્થન આપી રહ્યું છે. તાઈવાનને મળી રહેલા આંતરરાષ્ટ્રીય સમર્થન પર નારાજગી વ્યક્ત કરતા ચીને વોશિંગ્ટન પર આંતરિક મામલામાં હસ્તક્ષેપ કરવાનો આરોપ લગાવ્યો છે. ચીનનું કહેવું છે કે અમેરિકા તેની 'વન ચાઈના' નીતિથી પીછેહઠ કરી રહ્યું છે, જેના હેઠળ વોશિંગ્ટન તાઈવાનની સ્વતંત્રતાનું જાહેરમાં સમર્થન નથી કરતું.
