પેન્સિલવેનિયાના યોર્ક કાઉન્ટીમાં 17 સપ્ટેમ્બરના રોજ નોર્થ કોડોરસ ટાઉનશિપમાં એક ગંભીર ફાયરિંગની ઘટના બની, જેમાં ત્રણ પોલીસ અધિકારીઓના મોત થયા અને બે લોકો ઘાયલ થયા. આ ઘટના બપોરે લગભગ 2:10 વાગ્યે હાર રોડ અને એમિગ રોડના વિસ્તારમાં બની, જ્યાં પોલીસ અધિકારીઓ એક ડોમેસ્ટિક (ઘરેલું) તપાસના સંબંધમાં વોરંટ ઇશ્યુ કરવા ગયા હતા,
ફાયરિંગમાં 3 પોલીસ અધિકારીઓના મોત
પેન્સિલવેનિયા સ્ટેટ પોલીસના કમિશનર કર્નલ ક્રિસ્ટોફર પેરિસના જણાવ્યા અનુસાર, શંકાસ્પદ વ્યક્તિએ અધિકારીઓ પર ગોળીબાર કર્યો, જેના જવાબમાં પોલીસે પણ ગોળીબાર કર્યો, જેમાં શંકાસ્પદ વ્યક્તિ માર્યો ગયો. ઘાયલ થયેલા બે અધિકારીઓને વેલસ્પાન યોર્ક હોસ્પિટલમાં એડમિટ કરવામાં આવ્યા, જ્યાં તેઓ હાલ ગંભીર સ્થિતિમાં છે. આ ઘટનામાં નોર્થર્ન યોર્ક રિજનલ પોલીસ ડિપાર્ટમેન્ટના ચાર અધિકારીઓ અને એક યોર્ક કાઉન્ટી શેરિફના ડેપ્યુટીનો સમાવેશ થાય છે.
ધ્વજને અડધી કાંઠીએ ફરકાવવાનો આદેશ આપ્યો
શંકાસ્પદ વ્યક્તિ સામે સ્ટોકિંગ અને ક્રિમિનલ ટ્રેસપાસના આરોપો હેઠળ વોરંટ જારી કરવામાં આવ્યું હતું.પેન્સિલવેનિયા સ્ટેટ પોલીસ, યોર્ક કાઉન્ટી ડિસ્ટ્રિક્ટ એટર્નીની ઓફિસ, અને અન્ય અધિકારીઓએ હજુ સુધી શંકાસ્પદ વ્યક્તિનું નામ અથવા વ્યક્તિગત વિગતો જાહેર કરી નથી. પેન્સિલવેનિયાના ગવર્નર જોશ શાપિરોએ આ ઘટનાને યોર્ક કાઉન્ટી અને સમગ્ર કોમનવેલ્થ માટે દુ:ખદ ગણાવી. તેમણે મૃત અધિકારીઓના પરિવારો સાથે મુલાકાત કરી અને ધ્વજને અડધી કાંઠીએ ફરકાવવાનો આદેશ આપ્યો.
શેલ્ટર-ઇન-પ્લેસ ઓર્ડર જારી કરવામાં આવ્યો
યુ.એસ. એટર્ની જનરલ પામ બોન્ડીએ આ હુમલાને "સમાજ પરનું કલંક" ગણાવ્યુ. FBI અને ATF તપાસમાં સ્થાનિક પોલીસને મદદ કરી રહ્યા છે. આ ઘટનાને કારણે આસપાસના વિસ્તારમાં સ્થાનિક શાળાઓમાં થોડા સમય માટે શેલ્ટર-ઇન-પ્લેસ ઓર્ડર જારી કરવામાં આવ્યો હતો, જે પાછળથી હટાવી લેવામાં આવ્યો.
યોર્ક કાઉન્ટીમાં આ વર્ષે બીજી મોટી ઘટના ઘટી
પેન્સિલવેનિયા સ્ટેટ પોલીસ અને યોર્ક કાઉન્ટી ડિસ્ટ્રિક્ટ એટર્નીની ઓફિસ તપાસનું નેતૃત્વ કરી રહ્યા છે, અને હાલમાં આ વિસ્તારને સીલ કરી દેવામાં આવ્યો છે. યોર્ક કાઉન્ટીમાં આ વર્ષે બીજી મોટી ઘટના ઘટી છે, જેમાં પોલીસ અધિકારીઓએ જીવ ગુમાવ્યો. આ પહેલાં ફેબ્રુઆરી 2025માં વેસ્ટ યોર્કના પેટ્રોલમેન એન્ડ્રુ ડ્યુઆર્ટે UPMC મેમોરિયલ હોસ્પિટલમાં એક ઘેરાબંધી દરમિયાન જીવ ગુમાવ્યો હતો. યોર્ક કાઉન્ટી, જેની વસ્તી લગભગ 4,56,000 છે, ફિલાડેલ્ફિયાથી બે કલાકની ડ્રાઇવ અને બાલ્ટીમોરથી એક કલાકની ડ્રાઇવના અંતરે આવેલું છે
