Afghanistan Child Marriage Case: અફઘાનિસ્તાનમાં 45 વર્ષના શખ્સે 6 વર્ષની બાળકી સાથે કર્યા લગ્ન, તાલિબાને શું કહ્યુ?

બાળકીના પિતા અને લગ્ન કરનાર શખ્સની ધરપકડ કરવામાં આવી છે. પરંતુ કોઇ કેસ દાખલ કરવામાં નથી આવ્યો. વર્ષ 2021 પછી અફઘાનિસ્તાનમાં બાળ વિવાહના કેસ વધ્યા છે. 6 વર્ષની બાળકીની દુલ્હન બનેલી ફોટો સોશિયલ મીડિયામાં વાયરલ થયા બાદ લોકોનો રોષ સાતમાં આસમાને પહોંચ્યો છે. બાળકીના પિતાએ તેને પૈસા માટે વેંચી છે. અને બદલામાં 45 વર્ષના શખ્સને લગ્ન કરવા માટે પુત્રીને આપી દીધી છે.

તાલિબાન અધિકારીઓેએ મેળવ્યો બાળકીનો કબ્જો

બાળ વિવાહ અંગે સમાચાર સામે આવ્યા બાદ તાલિબાન સરકારે કહ્યુ છે કે, બાળકીની ઉંમર 9 વર્ષની થશે. પછી જ તેને તેના પિતાના ઘરે મોકલવામાં આવશે. અમેરિકામાં સ્થિત અફઘાનિસ્તાન મીડિયા એજન્સીએ જણાવ્યુ છે કે, આ લગ્ન અફઘાનિસ્તાનના મરજાહ જિલ્લામાં થયા છે. આ લગ્ન માટે બાળકીના પિતાને મોટા પ્રમાણમાં નાણાં આપવામાં આવ્યા છે. આ 45 વર્ષનો શખ્સ અગાઉ બે લગ્ન કરી ચુક્યો છે. તાલિબાની અધિકારીઓએ આ બાળકીનો કબ્જો મેળવ્યો છે. અને 9 વર્ષની થયા બાદ તે બાળકીને તેના પિતાના ઘરે મોકલવામાં આવશે.

બાળ વિવાહનું વધ્યુ પ્રમાણ

અફઘાનિસ્તાનમાં લગ્ન કરવા માટે કોઇ કાયદાકીય ઉંમર નક્કી નથી કરાઇ. 16 વર્ષ સુધી યુવતીઓના લગ્ન કરવામાં આવે છે. પરંતુ તાલિબાન સરકારે આ મામલે કોઇ નિર્ણય નથી કર્યો. સંયુક્ત રાષ્ટ્રની એક રિપોર્ટ પ્રમાણે અફઘાનિસ્તાનમાં શિક્ષણ પર પ્રતિબંધ ફરમાવાયો છે. જેના કારણે બાળ વિવાહ અને નાની ઉંમરે બાળકો પેદા કરવાના પ્રમાણમાં નોંધપાત્ર વધારો જોવા મળ્યો છે. જેના કારણે સરકારમાં ચિંતા જોવા મળી છે.