અમેરિકા ઈરાન પર હુમલો કરવાની યોજના બનાવી રહ્યું છે એવી ચર્ચાઓ ફરી તેજ બની છે. અહેવાલો અનુસાર, અમેરિકન અધિકારીઓ રાષ્ટ્રપતિ ડોનાલ્ડ ટ્રમ્પ દ્વારા આપવામાં આવેલી ધમકીઓને કેવી રીતે અમલમાં મૂકવી અને ઈરાનના લશ્કરી ઠેકાણાઓને કેવી રીતે નિશાન બનાવવું તે અંગે આંતરિક ચર્ચા કરી રહ્યા છે.
લશ્કરી થાણાઓ પર હવાઇ હુમલાના વિકલ્પો
અહેવાલમાં જણાવાયું છે કે અમેરિકન સરકાર ઈરાનમાં આવેલા અનેક લશ્કરી થાણાઓ પર હવાઈ હુમલાના વિકલ્પો પર વિચાર કરી રહી છે. જોકે, આ બાબતે હજુ સુધી કોઈ અંતિમ નિર્ણય લેવામાં આવ્યો નથી. અધિકારીઓ વચ્ચે આ મુદ્દે સંપૂર્ણ સહમતિ પણ બની નથી. એટલે કે, હાલની યોજના હોવા છતાં હુમલો થશે જ એવું નિશ્ચિત નથી.
ઇરાનની આસપાસ કોઇ ખાસ લશ્કરી હલચાલ
મહત્વની વાત એ છે કે અમેરિકાએ અત્યાર સુધી ઈરાનની આસપાસ કોઈ ખાસ લશ્કરી હલચાલ કરી નથી. કોઈ નવા સૈનિકો તૈનાત કરવામાં આવ્યા નથી અને ન તો કોઈ વિશેષ શસ્ત્રો મોકલવામાં આવ્યા છે. તેથી, અમેરિકાની આ યોજના માત્ર તૈયારી અને દબાણની રાજનીતિનો ભાગ પણ હોઈ શકે છે.
વિરોધ પ્રદર્શનોને ખુલ્લું સમર્થન
આ વચ્ચે, અમેરિકાના રાષ્ટ્રપતિ ડોનાલ્ડ ટ્રમ્પ ઈરાનમાં સરકાર વિરુદ્ધ ચાલી રહેલા વિરોધ પ્રદર્શનોને ખુલ્લું સમર્થન આપી રહ્યા છે. તેમણે સોશિયલ મીડિયા પર પોસ્ટ કરીને કહ્યું છે કે “ઈરાન કદાચ ક્યારેય ન જોઈ હોય તેવી સ્વતંત્રતા તરફ આગળ વધી રહ્યું છે. અમેરિકા મદદ કરવા તૈયાર છે.” ટ્રમ્પના આ નિવેદન બાદ ઈરાન-અમેરિકા સંબંધોમાં વધુ તણાવ જોવા મળી રહ્યો છે.
ભગવાનના દુશ્મન ગણાશે અને તેમને મૃત્યુદંડ
ઈરાનમાં હાલ સરકાર વિરુદ્ધ પ્રદર્શનો ચાલી રહ્યા છે. 10 જાન્યુઆરીના રોજ ઈરાન સરકાર તરફથી કડક નિવેદનો આવ્યા હતા. ઈરાનના એટર્ની જનરલ મોહમ્મદ મોવાહેદી આઝાદે ચેતવણી આપી હતી કે વિરોધ પ્રદર્શનમાં સામેલ લોકો ભગવાનના દુશ્મન ગણાશે અને તેમને મૃત્યુદંડ સુધીની સજા થઈ શકે છે.
આયાતુલ્લાહ અલી ખામેનીએ પણ કડક કાર્યવાહી
ઈરાનના સર્વોચ્ચ નેતા આયાતુલ્લાહ અલી ખામેનીએ પણ કડક કાર્યવાહી કરવાની હાકલ કરી છે. ઈરાની રાજ્ય ટેલિવિઝન મુજબ, પ્રદર્શનકારોને મદદ કરનારાઓ સામે પણ કડક કાર્યવાહી કરવામાં આવશે. આમ, એક તરફ આંતરિક અશાંતિ અને બીજી તરફ અમેરિકાનું દબાણ—ઈરાન માટે પરિસ્થિતિ વધુ જટિલ બની રહી છે.
આ પણ વાંચો : World News : અશ્લીલ ફોટાના વિવાદ બાદ X ની મોટી કાર્યવાહી, 600 એકાઉન્ટ અને 3,500 પોસ્ટ્સ ડિલીટ
