અમેરીકાના રાષ્ટ્રપતિ ડોનાલ્ડ ટ્રમ્પ ગાઝા યુદ્ધમાં મુખ્ય ભૂમિકા ભજવી રહ્યા છે. જ્યારે તેઓ સંઘર્ષને સમાપ્ત કરવા માટે સક્રિયપણે કામ કરી રહ્યા છે, ત્યારે તેમના પોતાના દેશમાં શિકાગોની પરિસ્થિતિ વધુ ખરાબ થઈ રહી છે. શિકાગો ફરી એકવાર ચર્ચામાં છે. બગડતી પરિસ્થિતિને કારણે રાષ્ટ્રપતિ ટ્રમ્પે રવિવારે 300 નેશનલ ગાર્ડ સૈનિકોને તૈનાત કરવાનો આદેશ આપ્યો છે. જોકે, ઈલિનોઈસના ગવર્નર જે.બી. પ્રિટ્ઝકરે આ પગલાનો વિરોધ કર્યો છે. ટ્રમ્પનો નેશનલ ગાર્ડ તૈનાત કરવાનો નિર્ણય ફેડરલ ઈમિગ્રેશન એજન્ટો અને વિરોધીઓ વચ્ચે થયેલી અથડામણ પછી આવ્યો, જેમાં એક મહિલાને ગોળી વાગી હતી.
અથડામણ બ્રાઈટન પાર્ક વિસ્તારમાં બની
આ અથડામણ બ્રાઈટન પાર્ક વિસ્તારમાં થઈ હતી, જ્યાં યુએસ બોર્ડર પેટ્રોલ એજન્ટોએ દાવો કર્યો હતો કે પ્રદર્શનકારીઓના લગભગ 10 વાહનોએ તેમના વાહનોને ઘેરી લીધા હતા અને તેમના વાહનો પર હુમલો કર્યો હતો. એજન્ટોના જણાવ્યા મુજબ એક મહિલાએ તેમના પર અર્ધ-સ્વચાલિત હથિયાર તાક્યું હતું, જેના કારણે એજન્ટોએ વળતો ગોળીબાર કર્યો હતો. મહિલા, જે એક યુએસ નાગરિક છે, તેને ગોળી વાગ્યા બાદ હોસ્પિટલમાં લઈ જવામાં આવી હતી, પરંતુ તેની સ્થિતિ વિશે કોઈ માહિતી જાહેર કરવામાં આવી ન હતી. કોઈ પણ ફેડરલ અધિકારી ગંભીર રીતે ઘાયલ થયા નથી.
સુરક્ષા વધારવાના અપાયા ઓર્ડર
હોમલેન્ડ સિક્યુરિટી સેક્રેટરી ક્રિસ્ટી નોએમે જણાવ્યું હતું કે વિસ્તારમાં સુરક્ષા જાળવવા માટે ખાસ ઓપરેશન ટીમો મોકલવામાં આવી રહી છે, તેમણે આ હુમલાને ઉશ્કેરણી વગરનો અને હિંસક કૃત્ય ગણાવ્યો હતો. આ દરમિયાન શિકાગોમાં ઈમિગ્રેશન અધિકારીઓની વધતી હાજરી સામે વિરોધ પ્રદર્શનો વધુ તીવ્ર બન્યા છે. પ્રદર્શનકારીઓએ ICE (ઈમિગ્રેશન અને કસ્ટમ્સ એન્ફોર્સમેન્ટ) સુવિધાઓની બહાર વાહનોને અવરોધિત કર્યા હતા, જેના કારણે એજન્ટોએ મરીના સ્પ્રે અને રબર બુલેટનો ઉપયોગ કર્યો હતો.
ગવર્નર અને વ્હાઈટ હાઉસ વચ્ચે ટક્કર
ગવર્નર પ્રિત્ઝકર નેશનલ ગાર્ડ તૈનાત કરવાના વિરોધમાં હતા. તેમણે ટ્રમ્પના નિર્ણયની સખત નિંદા કરતા કહ્યું, "રાષ્ટ્રપતિ દ્વારા રાજ્યના ગવર્નરની ઈચ્છા વિરુદ્ધ રાજ્યની સરહદોમાં લશ્કરી દળો તૈનાત કરવાનો આદેશ આપવો તે સંપૂર્ણપણે અસ્વીકાર્ય અને બિન-અમેરિકન છે."
પોલીસ અને વિરોધીઓ વચ્ચે અથડામણ થઈ
શિકાગો, ન્યુયોર્ક, લોસ એન્જલસ અને પોર્ટલેન્ડ જેવા મુખ્ય શહેરોમાં ચાલી રહેલા વિરોધ પ્રદર્શનો વચ્ચે ગોળીબારની આ ઘટના બની છે. ગયા અઠવાડિયે બ્રોડવ્યુ ICE સુવિધાની બહાર પોલીસ અને વિરોધીઓ વચ્ચે અથડામણ થઈ હતી, જ્યાં અટકાયત કરાયેલા ઈમિગ્રન્ટ્સના પરિવહનને રોકવાનો પ્રયાસ કરવામાં આવ્યો હતો. દેશભરના વિરોધીઓ ફેડરલ એજન્સીઓ દ્વારા અતિશય બળપ્રયોગ અને લોકશાહી અધિકારોના ઉલ્લંઘનનો આરોપ લગાવે છે.
