Donald Trump: વેનેઝુએલા પર અમેરિકી કબજો અને પોતાને જાહેર કર્યા કાર્યકારી રાષ્ટ્રપતિ

અમેરિકી રાષ્ટ્રપતિ ડોનાલ્ડ ટ્રમ્પે વૈશ્વિક રાજનીતિના તમામ નિયમોને નેવે મૂકીને એક અત્યંત ચોંકાવનારો દાવો કર્યો છે. ઈરાન અને ગ્રીનલેન્ડ પરના નિવેદનો બાદ, હવે ટ્રમ્પે પોતાની જાતને વેનેઝુએલાના કાર્યકારી રાષ્ટ્રપતિ તરીકે જાહેર કરીને વિશ્વભરમાં સનસનાટી મચાવી દીધી છે.

સોશિયલ મીડિયા પર ખળભળાટ

 ટ્રમ્પે તેમના પ્લેટફોર્મ 'ટ્રુથ સોશિયલ' પર એક ફોટો શેર કર્યો છે, જેમાં વિકિપીડિયાના એક એડિટ કરેલા પેજ દ્વારા તેમને વેનેઝુએલાના વર્તમાન રાષ્ટ્રપતિ તરીકે દર્શાવવામાં આવ્યા છે. આ ફોટોમાં તેમનો કાર્યકાળ જાન્યુઆરી 2026 સુધીનો હોવાનું દેખાય છે. આ પોસ્ટ એવા સમયે આવી છે જ્યારે ટ્રમ્પ સતત વેનેઝુએલાના વિશાળ તેલ ભંડારો પર નિયંત્રણ મેળવવા માટે તેલ કંપનીઓ સાથે સક્રિય રીતે બેઠકો કરી રહ્યા છે.

સત્તા પલટો અને સૈન્ય કાર્યવાહી

આ સમગ્ર વિવાદની શરૂઆત ત્યારે થઈ જ્યારે અમેરિકાએ વેનેઝુએલા પર સૈન્ય કાર્યવાહી કરી અને ત્યાંના રાષ્ટ્રપતિ નિકોલાસ મદુરોની ધરપકડ કરી. આ ઘટના બાદ ટ્રમ્પે સ્પષ્ટ કર્યું છે કે જ્યાં સુધી વેનેઝુએલામાં સુરક્ષિત અને સમજદારીભર્યું સત્તાંતરણ (Power Transition) ન થાય, ત્યાં સુધી અમેરિકા જ ત્યાંની સરકારનું સંચાલન કરશે.

વૈશ્વિક અસરો અને ઓઇલનું રાજકારણ

ટ્રમ્પના આ પગલાને વેનેઝુએલાના કુદરતી સંસાધનો, ખાસ કરીને ક્રૂડ ઓઈલ પર અમેરિકાનું વર્ચસ્વ સ્થાપિત કરવાના પ્રયાસ તરીકે જોવામાં આવે છે. એક તરફ તે ઈરાન સામે આક્રમક વલણ અપનાવી રહ્યા છે અને બીજી તરફ ગ્રીનલેન્ડ ખરીદવાની ઈચ્છા વ્યક્ત કરી રહ્યા છે, ત્યારે વેનેઝુએલા પર સીધું શાસન ચલાવવાની તેમની આ જાહેરાતે લોકશાહી અને આંતરરાષ્ટ્રીય સાર્વભૌમત્વ અંગે અનેક પ્રશ્નો ઉભા કર્યા છે.

આ પણ વાંચોઃ ડોનાલ્ડ ટ્રમ્પના નિર્ણયને અવરોધનાર ભારતીય મૂળના આ વ્યક્તિની કેમ થઇ રહી છે ચર્ચા?, જાણો