India US Relationship: ટ્રમ્પના 'શ્રેષ્ઠ' મિત્ર પોસ્ટ પર PM મોદીનો જવાબ, અમેરિકાને 'અંગત મિત્ર' ગણાવ્યું

PM મોદીએ સોશિયલ મીડિયા પર પોસ્ટ કર્યું કે ભારત અને અમેરિકા નજીકના મિત્રો અને કુદરતી ભાગીદાર છે. મને ખાતરી છે કે અમારી વેપાર વાટાઘાટો ભારત-અમેરિકા ભાગીદારીની અમર્યાદિત શક્યતાઓનો માર્ગ ખોલશે. અમારી ટીમો શક્ય તેટલી વહેલી તકે આ દિશામાં ચર્ચા કરવા માટે કામ કરી રહી છે. હું રાષ્ટ્રપતિ ટ્રમ્પ સાથે વાત કરવા માટે પણ આશાવાદી છું. અમે બંને દેશોના લોકો માટે સુવર્ણ અને વધુ સમૃદ્ધ ભવિષ્ય બનાવવા માટે કામ કરીશું.

મને ખાતરી છે કે આ વાતચીત આપણા બંને મહાન દેશો માટે સફળ નિષ્કર્ષ લાવશે:  ટ્રમ્પ

અગાઉ યુએસ રાષ્ટ્રપતિ ડોનાલ્ડ ટ્રમ્પે સોશિયલ મીડિયા પ્લેટફોર્મ ટ્રુથ સોશિયલ પર પોસ્ટ કરીને કહ્યું હતું કે તેમને જાહેરાત કરતા આનંદ થાય છે કે ભારત અને અમેરિકા વેપાર અવરોધોને દૂર કરવા માટે વાતચીત ચાલુ રાખી રહ્યા છે. હું આગામી અઠવાડિયામાં મારા ખૂબ જ સારા મિત્ર, વડાપ્રધાન મોદી સાથે વાત કરવા માટે આતુર છું. મને ખાતરી છે કે આ વાતચીત આપણા બંને મહાન દેશો માટે સફળ નિષ્કર્ષ લાવશે.

ટ્રમ્પે પીએમ મોદી અને અમેરિકા વચ્ચેના મજબૂત સંબંધો પર ભાર મૂક્યો હતો

આવું પહેલીવાર બન્યું નથી. શનિવારે ટ્રમ્પે પણ પીએમ મોદી અને અમેરિકા વચ્ચેના મજબૂત સંબંધો પર ભાર મૂક્યો હતો, તેમણે અમેરિકા-ભારત સંબંધોને 'ખાસ' ગણાવ્યા હતા. ટ્રમ્પે કહ્યું હતું કે હું હંમેશા પીએમ મોદીનો મિત્ર રહીશ. તેઓ એક મહાન વડાપ્રધાન છે. હું હંમેશા મિત્ર રહીશ, પરંતુ તેઓ હાલમાં જે કરી રહ્યા છે તે મને ગમતું નથી. પરંતુ ભારત અને અમેરિકા વચ્ચેનો સંબંધ ખૂબ જ ખાસ છે. ચિંતા કરવાની કોઈ વાત નથી. ક્યારેક આપણી પાસે ફક્ત કેટલાક મતભેદો હોય છે.