G7 સમિટમાં વડાપ્રધાન મોદી અને મેલોની મળ્યા, કહ્યું 'અમે તો ઈન્સ્ટાગ્રામ પર સૌથી વધુ ફેમસ છીએ'

ફ્રાન્સના એવિયન શહેરમાં યોજાઈ રહેલી G7 શિખર સંમેલન દરમિયાન ભારતના વડાપ્રધાન નરેન્દ્ર મોદી અને ઇટાલીની વડાપ્રધાન જ્યોર્જિયા મેલોની વચ્ચે અનૌપચારિક મુલાકાત થઈ. જોકે આ મુલાકાત ઔપચારિક ન હોવા છતાં વૈશ્વિક સ્તરે ચર્ચાનું કેન્દ્ર બની છે. બંને નેતાઓ વચ્ચેની વાતચીતનો વીડિયો પણ સોશિયલ મીડિયા પર ઝડપથી વાયરલ થઈ રહ્યો છે.

તમને ફરી મળીને આનંદ થયો : મેલોની 

મુલાકાત દરમિયાન જ્યોર્જિયા મેલોનીએ હળવા અંદાજમાં વડાપ્રધાન મોદીને કહ્યું કે, 'તમને ફરી મળીને આનંદ થયો, આખરે આપણે ઈન્સ્ટાગ્રામ પર સૌથી વધુ લોકપ્રિય છીએ'. મેલોનીની આ ટિપ્પણી સાંભળીને બંને નેતાઓ હસતા જોવા મળ્યા હતા. તેમની આ વાતચીતે ફરી એકવાર સોશિયલ મીડિયા પર ચર્ચા જગાવી છે.

20 મેના રોજ બંને વચ્ચે થઈ હતી મુલાકાત

તાજેતરમાં વડાપ્રધાન મોદી ઈટાલીની સત્તાવાર મુલાકાતે ગયા હતા. 19 અને 20 મે દરમિયાન યોજાયેલી આ મુલાકાત દરમિયાન ભારત અને ઇટાલી વચ્ચે સુરક્ષા, ક્રિટિકલ મિનરલ્સ, આરોગ્ય સહિતના લગભગ 15 મહત્વપૂર્ણ કરારો પર હસ્તાક્ષર થયા હતા. ઉપરાંત વર્ષ 2027ને ભારત-ઇટાલી ‘ઈયર ઓફ કલ્ચર એન્ડ ટૂરિઝમ’ તરીકે ઉજવવાનો નિર્ણય પણ લેવામાં આવ્યો હતો.

મેલોડી ટોફી ભેટમાં આપવાનો વીડિયો સોશિયલ મીડિયા પર વાયરલ 

મોદીની ઈટાલી મુલાકાત દરમિયાન બંને નેતાઓ વચ્ચેનો 'મેલોડી મોમેન્ટ' ખાસ ચર્ચામાં રહ્યો હતો. તે સમયે વડાપ્રધાન મોદીએ મેલોનીને 'મેલોડી' ટોફી ભેટમાં આપી હતી. મેલોનીએ આ ભેટને ખૂબ જ ખાસ ગણાવી હતી અને તેનો વીડિયો પોતાના ઈન્સ્ટાગ્રામ એકાઉન્ટ પર શેર કર્યો હતો. આ વીડિયો થોડા જ સમયમાં સોશિયલ મીડિયા પર વાયરલ થઈ ગયો હતો અને તેને 10 મિલિયનથી વધુ લાઇક્સ મળી હતી. હવે G7 સમિટ દરમિયાન બંને નેતાઓની ફરી મુલાકાત થતાં ‘મેલોડી મોમેન્ટ’ એકવાર ફરી ચર્ચાનો વિષય બન્યો છે.

આ પણ વાંચો : Trilateral Highway: કલકત્તાથી થાઇલેન્ડ સુધી બનશે રસ્તો, ભારતના માસ્ટરસ્ટ્રોકથી ફફડી ગયું ચીન