ઈરાન અને રશિયા ગુરુવારે ઓમાનના અખાત અને ઉત્તરી હિંદ મહાસાગરમાં સંયુક્ત નૌકાદળ અભ્યાસ કરશે. આ મિલિટ્રી ડ્રિલ જીનીવામાં તેહરાન અને વોશિંગ્ટન વચ્ચેની તાજેતરની વાતચીત બાદ થઈ છે. સોમવારે, ઈરાનના રિવોલ્યુશનરી ગાર્ડ્સે પણ વ્યૂહાત્મક રીતે મહત્વપૂર્ણ વિસ્તાર હોર્મુઝ સ્ટ્રેટમાં સૈન્ય અભ્યાસ કર્યો હતો. યુએસ નેવી ત્યાં પહેલેથી જ તૈનાત છે, તેથી આ પગલાને યુનાઈટેડ સ્ટેટ્સને સંદેશ તરીકે જોવામાં આવી રહ્યું છે.
મળતી માહિતી મુજબ બંને દેશોની નૌકાદળો ગુરુવારે ઓમાનના અખાત અને ઉત્તરી હિંદ મહાસાગરમાં યુદ્ધાભ્યાસ કરશે. તેમણે કહ્યું કે આનો ઉદ્દેશ્ય દરિયાઈ સુરક્ષાને મજબૂત બનાવવા અને ઈરાની અને રશિયન નૌકાદળો વચ્ચે સહયોગ વધારવાનો છે. જોકે, અભ્યાસનો સમયગાળો જાહેર કરવામાં આવ્યો નથી.
બીજો રાઉન્ડની વાતચીતમાં કોઈ પરિણામ ના આવ્યું
ઈરાન અને રશિયા વચ્ચેની આ કવાયત એવા સમયે થઈ રહી છે જ્યારે ઓમાનની મધ્યસ્થી હેઠળ જીનીવામાં ઈરાન અને અમેરિકા વચ્ચે બીજા તબક્કાની વાતચીત ચાલી રહી છે. ટ્રમ્પના સલાહકારો, જેરેડ કુશનર અને સ્ટીવ વિટકોફે ઈરાની વિદેશ પ્રધાન અબ્બાસ અરાઘચી સાથે ત્રણ કલાક વાતચીત કરી હતી. બંને પક્ષોએ સકારાત્મક નિવેદનો આપ્યા હતા, પરંતુ વાટાઘાટો કોઈ નિષ્કર્ષ પર પહોંચી શકી ન હતી. યુએસ ઉપરાષ્ટ્રપતિ જે.ડી. વાન્સે લશ્કરી કાર્યવાહીનો સંકેત પણ આપ્યો છે.
બંને દેશોએ અગાઉ વાતચીત કરી હતી, પરંતુ જૂન 2025માં ઈઝરાયલી હુમલા પછી પરિસ્થિતિ વધુ વણસી હતી. તે હુમલાથી 12 દિવસનું યુદ્ધ થયું, જેમાં પાછળથી યુનાઈટેડ સ્ટેટ્સ પણ જોડાયું. યુએસ પ્રમુખ ડોનાલ્ડ ટ્રમ્પે આ પ્રદેશમાં એક મહત્વપૂર્ણ નૌકાદળ તૈનાત કર્યું છે, જેમાં બે વિમાનવાહક જહાજો, એક ડઝન યુદ્ધ જહાજો, સેંકડો ફાઈટર જેટ અને અસંખ્ય હવાઈ સંરક્ષણ સિસ્ટમનો સમાવેશ થાય છે. F-35, F-22 અને F-16 ફાઈટર જેટ પણ નિયમિતપણે આવી રહ્યા છે.
ઈરાને હોર્મુઝ સ્ટ્રેટ બંધ કરવાની આપી ધમકી
ઈરાને અગાઉ કહ્યું હતું કે જો અમેરિકા સાથે તણાવ વધશે તો તે હોર્મુઝ સ્ટ્રેટ બંધ કરી શકે છે. જોકે, તે હજુ સુધી સંપૂર્ણપણે બંધ થયું નથી. મંગળવારે ઈરાને લશ્કરી કવાયત દરમિયાન તેને થોડા કલાકો માટે બંધ કરી દીધું હતું. આ જળમાર્ગ વૈશ્વિક તેલ અને કુદરતી ગેસ પુરવઠા માટે મહત્વપૂર્ણ છે, જે વિશ્વના 20% તેલ અને કુદરતી ગેસનું વહન કરે છે.
આ પણ વાંચો : Brazil ના રાષ્ટ્રપતિ લુઈઝ ઈનાસીયો લુલા દા સિલ્વા ભારત પહોંચ્યા, AI સમિટમાં હાજરી આપશે
