ઐતિહાસિક રીતે પાકિસ્તાને હંમેશા પોતાની ભૌગોલિક સ્થિતિનો ઉપયોગ એક "સોદાબાજીના સાધન" તરીકે કર્યો છે. આજે જ્યારે પાકિસ્તાન ભયંકર આર્થિક કટોકટીમાં ફસાયેલું છે, ત્યારે શાહબાઝ સરકાર ફરી એકવાર જૂની રાજદ્વારી રણનીતિ અજમાવી રહ્યા છે. પાકિસ્તાન મધ્ય પૂર્વમાં શાંતિ મંત્રણાના આયોજક બનીને અમેરિકા પાસેથી "શાંતિ પુરસ્કાર" તરીકે મોટી નાણાકીય સહાય મેળવવાની પેરવી કરી રહ્યું છે. પરંતુ 1980 (અફઘાન-સોવિયત યુદ્ધ) અને 2000 (આતંકવાદ વિરુદ્ધ યુદ્ધ) ના દાયકાઓ જેવી સ્થિતિ હવે રહી નથી.
નફો હવે ખર્ચમાં ફેરવાયો
એક સમયે જ્યારે પણ પાકિસ્તાનના પડોશમાં અશાંતિ સર્જાતી, ત્યારે પાકિસ્તાનના ખજાનામાં અમેરિકી ડોલરોનો વરસાદ થતો હતો. દેવા માફી અને લશ્કરી સહાય પાકિસ્તાન માટે કમાણીનું સાધન હતું. પરંતુ 2026 ની વાસ્તવિકતા અલગ છે. આજે પ્રાદેશિક તણાવ પાકિસ્તાન માટે આવકનું સાધન બનવાને બદલે અર્થતંત્ર પર મોટો બોજ બની રહ્યો છે. વિદેશી રોકાણકારો અશાંતિને કારણે પાછા હટી રહ્યા છે અને પાકિસ્તાનનું વિદેશી હૂંડિયામણ (Foreign Exchange Reserve) ચિંતાજનક સ્તરે ઘટી રહ્યું છે. જે ભૌગોલિક સ્થાનનો ઉપયોગ પાકિસ્તાન "ભાડું" વસૂલવા માટે કરતું હતું, તે જ સ્થાન હવે સુરક્ષા અને આર્થિક પડકારોને કારણે માથાનો દુખાવો બની ગયું છે.
