પોલેન્ડ નાટો (NATO) દેશ છે અને તેના તમામ સભ્યોએ પોતાનું સંરક્ષણ બજેટ વધારવાનો નિર્ણય લીધો છે. પોલેન્ડે પણ પોતાનું સંરક્ષણ બજેટ વધારી દીધું છે અને આ વર્ષે મોટા પાયે હથિયારો ખરીદવાની તૈયારીમાં છે. આ માટે પોલેન્ડ રિઝર્વમાં રાખેલું સોનું વેચવાની યોજના બનાવી રહ્યું છે.
યુક્રેનને સાથ આપી રહ્યું છે પોલેન્ડ
પોલેન્ડ સરકાર અનામત રાખેલા સોનાનો ઉપયોગ કરીને હથિયારો ખરીદવા માટે પ્રસ્તાવ તૈયાર કરી રહી છે. જો આ પ્રસ્તાવ પર સામાન્ય સંમતિ બની જશે, તો સરકાર આ દિશામાં આગળ વધી શકે છે. પોલેન્ડ રશિયાનો પાડોશી દેશ છે અને પુતિનની સેનાની તેના પર નજર છે. યુરોપના નજીકના ગણાતા પોલેન્ડ અત્યારે યુદ્ધમાં યુક્રેનને સાથ આપી રહ્યું છે.
સોનું વેચીને હથિયારો ખરીદવાનો નિર્ણય
'ફાઇનાન્શિયલ ટાઇમ્સ'ના અહેવાલ મુજબ, સોના દ્વારા હથિયારો ખરીદવાની ચર્ચા માર્ચ મહિનામાં શરૂ થઈ હતી. પોલેન્ડની સેન્ટ્રલ બેંકના ગવર્નરે આ અંગે નિવેદન આપ્યું હતું, ત્યારબાદ આ વાત વાયુવેગે ફેલાઈ ગઈ. જોકે, નાણામંત્રીનું કહેવું છે કે અત્યારે માત્ર ચર્ચા ચાલી રહી છે અને કોઈ અંતિમ નિર્ણય લેવાયો નથી.
પોલેન્ડ પાસે હાલમાં ૫૫૦ ટન સોનું છે
સોનાનો ભંડાર: પોલેન્ડ પાસે હાલમાં ૫૫૦ ટન સોનું છે અને ગોલ્ડ રિઝર્વની બાબતમાં તે વિશ્વમાં ૧૧મા નંબરે છે. આ વર્ષના અંત સુધીમાં આ ભંડાર ૭૦૦ ટન સુધી પહોંચી શકે છે. સરકાર આ સોનાનો ઉપયોગ હથિયારો માટે કરવા માંગે છે.સંરક્ષણ બજેટ મુજબ, હથિયારો ખરીદવા માટે ૪૭ અબજ ડોલરની વધારાની રકમની જરૂર છે. આ રકમ કાં તો યુરોપિયન દેશો પાસેથી લોન તરીકે લેવી પડશે અથવા સરકારી તિજોરીમાંથી કાઢવી પડશે. બંને નિર્ણયો સરકાર માટે પડકારજનક છે. સરકારી અધિકારીઓના જણાવ્યા મુજબ બે વિકલ્પો છે,કાં તો સોનું વેચીને ભંડોળ એકત્ર કરવું અથવા સોનાનો અન્ય કોઈ રીતે ઉપયોગ કરીને નાણાં મેળવવા.પોલેન્ડ પર રશિયાનો હજુ સુધી કોઈ સીધો હુમલો થયો નથી, પરંતુ ભૂલથી રશિયન મિસાઈલો ઘણીવાર પોલેન્ડની સરહદમાં પડી છે. આ ઉપરાંત બંને દેશો વચ્ચે સાયબર યુદ્ધ પણ તેજ છે.
મોટા યુદ્ધનો ડર
ફેબ્રુઆરી ૨૦૨૬ માં પોલેન્ડે તેના નાગરિકો માટે ચેતવણી જાહેર કરી હતી, જેમાં રશિયા સાથે ભવિષ્યમાં મોટા યુદ્ધની શક્યતા વ્યક્ત કરવામાં આવી હતી. પોલેન્ડને એવા કેટલાક પુરાવા મળ્યા છે જેનાથી તે માને છે કે રશિયાનું આગામી લક્ષ્ય પોલેન્ડ હોઈ શકે છે.ઉલ્લેખનીય છે કે ૧૯૩૯ માં પોલેન્ડ પર જર્મનીના હુમલા બાદ જ બીજા વિશ્વયુદ્ધની શરૂઆત થઈ હતી. ઇતિહાસ ફરી ન દોહરાય તે માટે પોલેન્ડ અત્યારથી જ પોતાની સૈન્ય શક્તિ મજબૂત કરવામાં લાગી ગયું છે.
આ પણ વાંચો: Operation Sindoor:ઓપરેશન સિંદૂરથી ડરી ગયા હાફિઝ સઈદ અને મસૂદ અઝહર! એક વર્ષ પછી પણ અંડરગ્રાઉન્ડ
