પહલગામ હુમલા બાદ ભારતે 'ઓપરેશન સિંદૂર' ચલાવીને લશ્કર-એ-તૈયબા અને જૈશ-એ-મોહમ્મદના આતંકી ઠેકાણાઓને તબાહ કર્યા હતા. ત્યારથી હાફિઝ સઈદ અને મસૂદ અઝહર છુપાવવા માટે મજબૂર છે. અહેવાલો મુજબ, બંને પાકિસ્તાન સરકારના સંરક્ષણમાં છે અને ભારતીય સુરક્ષા એજન્સીઓ તેમના પર ચાંપતી નજર રાખી રહી છે.૨૨ એપ્રિલ ૨૦૨૫ના રોજ પહલગામમાં થયેલા આતંકી હુમલામાં ૨૬ લોકોએ જીવ ગુમાવ્યા હતા. જેના જવાબમાં ભારતે ૭ મેના રોજ 'ઓપરેશન સિંદૂર' લોન્ચ કર્યું. ભારતે પાકિસ્તાન અને પાક-અધિકૃત કાશ્મીર (PoK) માં લશ્કર-એ-તૈયબા, જૈશ-એ-મોહમ્મદ અને હિઝબુલ મુજાહિદ્દીનના ઠેકાણાઓને નિશાન બનાવ્યા હતા. આ હુમલાઓએ હાફિઝ સઈદ અને મસૂદ અઝહરના આતંકી સામ્રાજ્યને મૂળમાંથી હચમચાવી દીધું છે. એક વર્ષ બાદ આજે પણ આ બંને આતંકીઓ ખૌફમાં જીવી રહ્યા છે અને જાહેરમાં સામે આવી શક્યા નથી.
ઓપરેશન સિંદૂરમાં શું-શું તબાહ થયું?
ભારતે ઓપરેશન સિંદૂરમાં કુલ ૯ આતંકી ઠેકાણાઓ ધ્વસ્ત કર્યા હતા. સૌથી મહત્વનું નિશાન મુરીદકે હતું, જે લાહોરથી આશરે ૪૦ કિમી દૂર આવેલું લશ્કર-એ-તૈયબા (LeT) નું હેડક્વાર્ટર હતું. બીજું મોટું નિશાન બહાવલપુર હતું, જે જૈશ-એ-મોહમ્મદ (JeM)નો ગઢ ગણાય છે.એક મિસાઈલનું નિશાન મસૂદ અઝહર સાથે જોડાયેલું એક મદરેસું પણ હતું. પાકિસ્તાની મીડિયાના અહેવાલ મુજબ, મસૂદ અઝહરે પોતે સ્વીકાર્યું હતું કે તેણે ઓપરેશન સિંદૂરમાં તેના પરિવારના ૧૦ સભ્યો ગુમાવ્યા છે. આ ઉપરાંત ભારતે PoK ના કોટલી અને મુઝફ્ફરાબાદમાં પણ આતંકી ઠેકાણાઓ તોડી પાડ્યા હતા.
મસૂદ અઝહર છેલ્લે ક્યાં દેખાયો હતો?
પહલગામ હુમલા સમયે મસૂદ અઝહર બહાવલપુરમાં હતો, પરંતુ ઓપરેશન સિંદૂર બાદ તેને તાત્કાલિક ત્યાંથી ખસેડીને ગિલગિટ-બાલ્ટિસ્તાન લઈ જવામાં આવ્યો હતો. જુલાઈ ૨૦૨૫માં તે સ્કર્દુમાં આશરે ૨૦ દિવસ રહ્યો હતો, જ્યાં તેને અલગ-અલગ મસ્જિદો અને સરકારી ગેસ્ટ હાઉસમાં છુપાવીને રાખવામાં આવ્યો હતો. પાકિસ્તાનના પૂર્વ વિદેશ મંત્રી બિલાવલ ભુટ્ટોએ દાવો કર્યો હતો કે અઝહર પાકિસ્તાનમાં નથી, પરંતુ મીડિયા રિપોર્ટ્સ મુજબ તેને સ્કર્દુમાં જોવામાં આવ્યો હતો.
હાફિઝ સઈદ છેલ્લે ક્યાં જોવા મળ્યો?
ઓપરેશન સિંદૂર પહેલા હાફિઝ સઈદ લાહોરના જૌહર ટાઉનમાં જોવા મળ્યો હતો, જ્યાં તેના ઘરને જ સબ-જેલમાં ફેરવી દેવાયું હતું. પાકિસ્તાન દાવો કરે છે કે સઈદ ૨૦૧૯ થી જેલની સજા કાપી રહ્યો છે, પરંતુ ફેબ્રુઆરી ૨૦૨૫ સુધીમાં તેને ૨૦ થી વધુ વાર જાહેરમાં જોવામાં આવ્યો છે. બિલાવલ ભુટ્ટોએ ન્યૂયોર્ક ટાઈમ્સના અહેવાલ પર પ્રતિક્રિયા આપતા કહ્યું હતું કે જો બંને દેશો સહયોગ કરે તો પાકિસ્તાન હાફિઝ અને મસૂદને ભારતને સોંપવા તૈયાર છે, જેના પર હાફિઝના પુત્ર તલ્હા સઈદે ભારે નારાજગી વ્યક્ત કરી હતી.
અત્યારે ક્યાં છે મસૂદ અઝહર અને હાફિઝ સઈદ?
ઇન્ટેલિજન્સ રિપોર્ટ્સ મુજબ, આ બંને આતંકી સરગનાઓને રાવલપિંડી, કરાચી અને લાહોર વચ્ચે સતત શિફ્ટ કરવામાં આવી રહ્યા છે. ISI તેમને અલગ-અલગ સેફ હાઉસમાં રાખે છે. આંતરરાષ્ટ્રીય દબાણ હોવા છતાં બંને ISI અને પાકિસ્તાન સરકારના સંરક્ષણમાં છે, પરંતુ ભારતના ડરથી તેઓ લાંબા સમયથી ભૂગર્ભમાં છે.
આ પણ વાંચો: Hitler:જર્મન સરમુખત્યાર હિટલરે કેમ કરી આત્મહત્યા? મૃત્યુના ૨૪ કલાક પહેલા કર્યા હતા લગ્ન
