US બાદ ફ્રાન્સમાં શટડાઉન! ખર્ચ ઘટાડા સામે 200 શહેરોમાં હડતાળ, એફિલ ટાવર પણ બંધ

ફ્રાન્સના 200થી વધુ શહેરોમાં હજારો લોકો હડતાળ અને વિરોધ પ્રદર્શનમાં સામેલ થયા. જેમાં વર્ક્સ, રિટાયર્ડ લોકો અને વિદ્યાર્થીઓ પણ સામેલ હતા. પ્રદર્શનકારીઓના ખર્ચામાં ઘટાડાને કારણે વિરોધ કરીને શ્રીમંતો પર વધુ કર લાદવાની માંગ કરી છે. હડતાળને કારણે રાજધાની પેરિસમાં એફિલ ટાવર પણ બંધ રહ્યો હતો.

200થી વધુ શહેરોમાં પ્રદર્શન

ફ્રાંસના 200થી વધુ શહેરો અને ગામોમાં હજારો કામદારો, નિવૃત્ત લોકો અને વિદ્યાર્થીઓ રસ્તા પર ઉતર્યા. પેરિસમાં પ્રદર્શનકારોએ પ્લેસ દ’ઇટલી (Place d’Italie) પરથી માર્ચની શરૂઆત કરી. એફિલ ટાવર પ્રશાસને જાહેર કર્યું કે હડતાળના કારણે સ્મારક પર્યટકો માટે બંધ કરવામાં આવ્યું છે.

યુનિયનોના નેતૃત્વ હેઠળ વિરોધ

આ રાષ્ટ્રીય હડતાળ ફ્રાંસની મુખ્ય યુનિયનો દ્વારા બોલાવવામાં આવી છે. ગયા મહિનાથી બજેટને લઈને ચાલી રહેલી રાજકીય ઉથલપાથલ અને ચર્ચા વચ્ચે આ પ્રદર્શનોએ નવી કડી ઉમેરી છે. યુનિયનોનું કહેવું છે કે સરકારે પૂર્વ વડાપ્રધાનના બજેટ પ્રસ્તાવો છોડી દેવા જોઈએ, જેમાં સામાજિક કલ્યાણ યોજનાઓ પર ઘટાડો અને ખર્ચમાં કપાત સામેલ છે. યુનિયનોએ ચેતવણી આપી છે કે આવા પગલાંઓ નીચા અને મધ્યમ આવકવાળા લોકોની ખરીદી શક્તિને વધુ નબળી બનાવી દેશે. તેઓ અમીરો પર વધારે ટેક્સ લગાવાની માંગ કરી રહ્યા છે.

નવી સરકાર પર દબાણ

ગયા મહિને જ વડાપ્રધાન બનેલા સેબાસ્ટિયન લેકોર્નૂએ હજી સુધી પોતાના બજેટની વિગતવાર માહિતી આપી નથી અને ન તો પોતાની મંત્રિમંડળની ટીમની જાહેરાત કરી છે. અપેક્ષા છે કે આવતા દિવસોમાં સરકારનું ગઠન થશે અને વર્ષના અંત સુધીમાં સંસદમાં બજેટ બિલ પર ચર્ચા કરવામાં આવશે.