વૈશ્વિક અર્થતંત્ર અને ખાસ કરીને કાચા તેલના વ્યાપાર માટે સૌથી મહત્વપૂર્ણ ગણાતા દરિયાઈ માર્ગ 'સ્ટ્રેટ ઓફ હોર્મુઝને લઈને એક મોટા સમાચાર સામે આવ્યા છે. ઈરાને દાવો કર્યો છે કે આગામી 30 દિવસની અંદર આ વ્યૂહાત્મક દરિયાઈ માર્ગને સામાન્ય અવરજવર માટે ફરીથી ખોલી દેવામાં આવશે. ઈરાનના વિદેશ મંત્રી અબ્બાસ અરાગચીએ આ પગલાને અમેરિકા અને ઈરાન વચ્ચે હસ્તાક્ષર કરાયેલા સમજૂતી કરાર (MoU) નો એક મહત્વપૂર્ણ ભાગ ગણાવ્યો છે.
જંગ પહેલા જેવી જ સ્થિતિ પુનઃસ્થાપિત કરાશે
બગદાદમાં ઈરાકના વિદેશ મંત્રી ફુઆદ હુસૈન સાથે યોજાયેલી સંયુક્ત પત્રકાર પરિષદમાં અબ્બાસ અરાગચીએ માહિતી આપી હતી કે, કરાર હેઠળ હોર્મોઝ આગામી 30 દિવસમાં એવી જ રીતે સંપૂર્ણપણે ખુલી જશે જેવી રીતે તે યુદ્ધ પહેલા કાર્યરત હતો. ઈરાન આ દરિયાઈ માર્ગમાં ઉભા થયેલા તમામ અવરોધોને દૂર કરવા માટે તૈયાર છે. જોકે, તેમણે સ્પષ્ટ શબ્દોમાં જણાવ્યું હતું કે આ જળમાર્ગનું સંચાલન અને વ્યવસ્થાપન સંપૂર્ણપણે ઈરાન દ્વારા નક્કી કરાયેલા નિયમો અને વ્યવસ્થા હેઠળ જ રહેશે.
