અમેરિકા અને ઈરાન વચ્ચે તાજેતરમાં થયેલા ઐતિહાસિક શાંતિ સમજૂતી બાદ બંને દેશો વચ્ચે યોજાનારી પ્રથમ મહત્વપૂર્ણ ટેકનિકલ સ્તરની વાતચીત હાલ પૂરતી ટળી ગઈ છે. આ બેઠકમાં ભાગ લેવા માટે અમેરિકાના ઉપરાષ્ટ્રપતિ જેડી વેન્સ સ્વિટ્ઝરલેન્ડ જવાના હતા, પરંતુ હવે તેમનો આ પ્રવાસ રદ કરવામાં આવ્યો છે. વ્હાઇટ હાઉસ દ્વારા આ પ્રવાસ ટળવા પાછળ મુસાફરી અને આયોજન સંબંધિત લોજિસ્ટિક (વ્યવસ્થાપન) કારણો જવાબદાર હોવાનું જણાવવામાં આવ્યું છે.
લ્યુસર્ન શહેરમાં યોજાવાની હતી બેઠક
મળતી માહિતી મુજબ, અમેરિકા અને ઈરાન વચ્ચે થયેલા 14 મુદ્દાના એમઓયુ (MoU) ના ટેકનિકલ પાસાઓ પર ચર્ચા કરવા માટે શુક્રવારે સ્વિટ્ઝરલેન્ડના લ્યુસર્ન શહેરમાં આ હાઈ-પ્રોફાઈલ બેઠક પ્રસ્તાવિત હતી. આ બેઠકમાં બંને દેશોના પ્રતિનિધિઓ સમજૂતીની શરતોને લાગુ કરવા અને આગળની પ્રક્રિયાની રૂપરેખા તૈયાર કરવા માટે આમને-સામને બેસવાના હતા. જો કે, ઉપરાષ્ટ્રપતિ જેડી વેન્સે અગાઉથી જ સંકેત આપ્યા હતા કે તેમનો સ્વિટ્ઝરલેન્ડ પ્રવાસ હજુ સંપૂર્ણ રીતે નક્કી નથી થયો. બીજી તરફ, ઈરાનના વાર્તાકારોએ પણ જણાવ્યું હતું કે વાતચીતની તારીખ હજુ અંતિમ રીતે નક્કી થઈ નહોતી.
હવે ક્યારે થશે વાતચીત?
વ્હાઇટ હાઉસના પ્રવક્તાએ ગુરુવારે મોડી રાત્રે સ્પષ્ટ કર્યું કે ઉપરાષ્ટ્રપતિ વેન્સ હાલ સ્વિટ્ઝરલેન્ડ જઈ રહ્યા નથી. તેમણે ઉમેર્યું કે, "આવી જટિલ વાર્તાઓ માટેની વ્યવસ્થાઓ હંમેશા અનિશ્ચિત હોય છે. અમેરિકન ડેલિગેશન જરૂર પડ્યે તાત્કાલિક રવાના થવા માટે તૈયાર છે." વ્હાઇટ હાઉસના જણાવ્યા અનુસાર, ઈરાન સાથેની આગામી ટેકનિકલ વાર્તાની નવી તારીખો અને આગળના પગલાં ટૂંક સમયમાં જાહેર કરવામાં આવશે.
60 દિવસની ડેડલાઈન શરૂ
ઉલ્લેખનીય છે કે, તાજેતરમાં જ અમેરિકી રાષ્ટ્રપતિ ડોનાલ્ડ ટ્રમ્પ અને ઈરાનના રાષ્ટ્રપતિ મસુદ પેઝેશ્કિયને મહિનાઓથી ચાલી રહેલા સંઘર્ષનો અંત લાવવા માટે એક ઐતિહાસિક શાંતિ કરાર પર હસ્તાક્ષર કર્યા હતા. આ કરાર અમલમાં આવતાની સાથે જ યુદ્ધવિરામ લંબાવી દેવામાં આવ્યો છે. હવે બંને દેશો પાસે સમજૂતી સાથે જોડાયેલા તમામ ટેકનિકલ અને રાજકીય મુદ્દાઓ પર અંતિમ સહમતિ બનાવવા માટે માત્ર 60 દિવસનો સમય છે. વ્હાઇટ હાઉસમાં પત્રકાર પરિષદ દરમિયાન જેડી વેન્સે જણાવ્યું હતું કે અમેરિકા આ શાંતિ કરારના પ્રથમ તબક્કાને લાગુ કરવા માટે સંપૂર્ણ રીતે પ્રતિબદ્ધ છે અને 60 દિવસની આ સત્તાવાર અવધિ ગુરુવારથી જ શરૂ થઈ ચૂકી છે. બંને દેશો આ સમયમર્યાદામાં ઉકેલ લાવવા માટે મક્કમ છે.
આ પણ વાંચો:Strait of Hormuz: હોર્મુઝ ખૂલ્યું છતાં પડકારો યથાવત, હજુ પણ આ મુદ્દા પર ગૂંચવાયો મામલો
