દક્ષિણ ચીન સમુદ્રના સૌથી વિવાદિત વિસ્તારમાં એક મોટી જહાજ દુર્ઘટના સર્જાઈ છે. સિંગાપુરના ધ્વજ હેઠળ નોંધાયેલું અને લોખંડના અયસ્ક થી લદાયેલું માલવાહક જહાજ 'એમ/વી ડેવન બે' (M/V Devon Bay) ફિલિપાઇન્સથી ચીન જતી વખતે દરિયામાં પલટી ગયું છે. આ દુર્ઘટનામાં અત્યાર સુધીમાં બે ફિલિપીની નાવિકોના મોતના સમાચાર મળ્યા છે, જ્યારે ચાર લોકો હજુ પણ લાપતા છે.
દુર્ઘટના અને બચાવ કામગીરી
જહાજ પર કુલ 21 ફિલિપીની ક્રૂ સભ્યો સવાર હતા. ગુરુવારની રાત્રે જહાજ સાથેનો સંપર્ક અચાનક તૂટી ગયો હતો. આ ઘટનાની જાણ થતા જ ચીની તટરક્ષક દળ અને નૌકાદળે સંયુક્ત બચાવ અભિયાન હાથ ધર્યું હતું. શુક્રવાર સાંજ સુધીમાં 17 લોકોને દરિયામાંથી હેમખેમ બહાર કાઢવામાં આવ્યા હતા. બચાવેલા લોકો પૈકી 14 ની હાલત સ્થિર છે, જ્યારે એક વ્યક્તિ ગંભીર રીતે ઈજાગ્રસ્ત હોવાથી તેની સારવાર ચાલી રહી છે.
