- 2034માં મેન્સ ફૂટબોલ વર્લ્ડ કપની યજમાની કરશે સાઉદી
- યુએસમાં સાઉદીનું પ્રતિનિધિત્વ કરનાર પ્રથમ મહિલા
- મહિલાઓને દરેક સ્તરે આગળ લાવવા પ્રતિબદ્ધ છે પ્રિન્સેસ
સાઉદી અરેબિયા રમત જગતમાં પોતાનો વિશેષ પ્રભાવ દેખાડી રહ્યું છે. તાજેતરમાં સાઉદી કિંગડમે એક મોટી સ્પોર્ટસ ઇવેન્ટનું આયોજન કર્યું હતું. આ ઈવેન્ટમાં વિશ્વભરમાંથી રમતગમતના દિગ્ગજો સામેલ થયા હતાં. સાઉદી 2034માં ફૂટબોલ વર્લ્ડ કપનું આયોજન કરવા જઈ રહ્યું છે અને તેના માટે તમામ તૈયારીઓ કરવામાં આવી રહી છે. આ તૈયારીઓ પાછળ એક નામ જે ખૂબ જ મહત્વપૂર્ણ છે તે છે પ્રિન્સેસ રીમા બિંત બંદર અલ સઉદનું. તો ચાલો જાણીએ તેમના અદ્ભુત વ્યક્તિત્વ વિશે.
રમતગમતની પ્રવૃત્તિઓમાં પ્રિન્સેસનું યોગદાન
સાઉદી અરેબિયામાં ઉજવણીનો માહોલ જોવા મળી રહ્યો છે. આ ખાડી દેશ દરેક મોરચે ટોચ પર રહેવાનો પ્રયાસ કરે છે. આ જ કારણ છે કે સાઉદીમાં રમતગમતની પ્રવૃત્તિઓ અન્ય ખાડી દેશો કરતાં ઘણી વધારે છે. જ્યારે રમતની દુનિયામાં સાઉદીની રાજકુમારીનું નામ સામે આવે છે ત્યારે આ વધુ અસરકારક બને છે. સાઉદીમાં વધતી જતી રમત ગમત પ્રવૃત્તિઓમાં પ્રિન્સેસ રીમા બિન્ત બંદર અલ-સાઉદનું મોટું યોગદાન છે. સાઉદીનાં શાહી પરિવારના સભ્ય તરીકે પ્રિન્સેસ રીમા પાસે રમતગમત સાથે સંબંધિત ઘણા પોર્ટફોલિયો છે. તેઓ યુનાઇટેડ સ્ટેટ્સમાં સાઉદી અરેબિયાનું પ્રતિનિધિત્વ કરનાર પ્રથમ મહિલા છે. રીમા સાઉદી ઓલિમ્પિક અને પેરાલિમ્પિક સમિતિના વડા પણ છે અને આંતરરાષ્ટ્રીય ઓલિમ્પિક સમિતિના સભ્ય છે.
સાઉદીને સ્પોર્ટસનું વૈશ્વિક મંચ બનાવવામાં મહત્વપૂર્ણ ભૂમિકા
પ્રિન્સેસ રીમા સ્પોર્ટ્સ ડિપ્લોમસી, આંતરરાષ્ટ્રીય સંબંધો અને સાઉદી અરેબિયાને વૈશ્વિક રમતગમતના મંચ પર સ્થાપિત કરવામાં મોટી ભૂમિકા ભજવી રહ્યા છે. સાઉદી અરેબિયાએ 2034માં મેન્સ ફૂટબોલ વર્લ્ડ કપની યજમાની કરવાનો નિર્ણય લીધો છે. આ વર્લ્ડ કપ માટેની તૈયારીઓમાં હાલ પ્રિન્સેસ વ્યસ્ત છે.
મોહમ્મદ બિન સલમાનની અપેક્ષા મુજબ કરે છે કામ
સિંગાપોરની નેશનલ યુનિવર્સિટી ખાતે મિડલ ઇસ્ટ ઇન્સ્ટિટ્યૂટના સીનીયર ફેલો અને ધ ટર્બ્યુલન્ટ વર્લ્ડ ઑફ મિડલ ઇસ્ટ સોકરના લેખક જેમ્સ ડોર્સી કહે છે, "રીમા પ્રિન્સ મોહમ્મદ બિન સલમાન ઇચ્છે છે તે રીતે સાઉદી અરેબિયાને રજૂ કરે છે." રાજકુમારી રીમા મહિલા સ્વતંત્રતાની હિમાયત કરે છે અને મોહમ્મદ બિન સલમાનની અપેક્ષાઓ પર ખરા ઉતર્યા છે. આ જ કારણ છે કે પ્રિન્સે તેમને અમેરિકાના રાજદૂત તરીકે નિયુક્ત કર્યા છે. સ્પોર્ટ્સ ડિપ્લોમસીમાં સાઉદી અરેબિયાનું તેમનું પ્રતિનિધિત્વ પ્રશંસનીય છે.
રાજકીય ગતિવિધિઓથી દૂર રહે છે રાજકુમારી
રાજકુમારી રીમા રાજકીય ગતિવિધિઓથી દૂર રહેવાનું પસંદ કરે છે. રીમા બંદર બિન સુલતાન અલ-સાઉદની પુત્રી છે. રાજકુમારી તેના પિતાના આઠ બાળકોમાંની એક છે અને તેમણે અમેરિકામાં અભ્યાસ પૂર્ણ કર્યો છે. તેમણે વોશિંગ્ટન યુનિવર્સિટીમાંથી મ્યુઝિયમ સ્ટડીઝમાં સ્નાતકની ડિગ્રી મેળવી છે. રમતગમત ક્ષેત્રમાં તેમના કાર્યો પહેલાં તેમણે ઉચ્ચ સ્તરીય રિટેલમાં કામ કર્યું હતું.
મહિલાઓને પ્રોત્સાહન આપવા પર રાજકુમારીનો ભાર
રાજકુમારી રમતગમતની દુનિયામાં મહિલાઓના પ્રવેશની પણ હિમાયત કરે છે. તેમના નેતૃત્વમાં મહિલાઓ ફૂટબોલ સ્ટેડિયમમાં પણ જઈ શકે છે જેને તે મહિલાઓ માટે પ્રગતિ માને છે. રીમા કહે છે કે ''મહિલાઓ માત્ર રમવા સુધી મર્યાદિત રહેશે નહીં પરંતુ તે બોર્ડ સ્તર અને સલાહકાર સ્તરે મહિલાઓના પ્રવેશ માટે પ્રતિબદ્ધ છે.''
