મૉસ્કો આતંકવાદી હુમલાનો ISISએ વીડિયો ફૂટેજ વાયરલ કર્યો

• રશિયન સૈન્યએ તમામ આતંકીઓની ધરપકડ કરી કાર્યવાહી હાથ ધરી
  
• વૈશ્વિક આતંકવાદી સંગઠન ISISના આતંકી વીડિયોમાં ગોળીઓ વરસાવતા જોઈ શકાય છે
• આતંકીઓના કપડાં પર રહેલા કેમેરામાં સમગ્ર ઘટના કેદ થઈ

રશિયાની રાજધાની મૉસ્કોમાં શુક્રવારે એક હૉલમાં ચકચારી આતંકી હુમલો થયો હતો. જેની વિશ્વમાં ચોમેર ફિટકાર વરસી રહી છે. ત્યારે આ આતંકવાદી હુમલાનો વીડિયો સામે આવ્યો છે. વૈશ્વિક કુખ્યાત આતંકવાદી સંગઠન ISISએ આ હુમલાનો લાઈવ વીડિયો વાયરલ કર્યા છે. જેમાં આતંકવાદીઓના કપડાં પર રહેલા કેમેરાથી સમગ્ર ઘટના કેદ થઈ હતી. જેમાં અંધાધૂંધ ફાયરિંગમાં લોકો કઈ રીતે પોતાનો જીવ બચાવવા નાસભાગ કરી રહ્યા છે. તેમજ આતંકી ધડાધડ કંઈપણ વિચાર્યા વગર લોકો પર નિર્મમ ગોળીબાર કરી રહ્યા છે. આ હુમલામાં મૃતદેહો વેરવિખેર પડેલા દેખાઈ રહ્યા છે. જો કે આ વીડિયો ફૂટેજમાં તમામ આતંકવાદીઓના હાથમાં એકે-47 રાઈફલ અને દારૂગોળો પણ છે. મિલિટરી ડ્રેસમાં સજ્જ આતંકીઓ લોકો પર બેફામ ગોળીઓ વરસાવતા જોઈ શકાય છે.

 મૉસ્કોમાં થયેલા બર્બર આતંકવાદી હુમલા બાદ રશિયાની સુરક્ષા એજન્સીઓ એક્શનમાં આવી ગઈ છે. શનિવારે આ કેસમાં વધુ ચાર લોકોની ધરપકડ કરવામાં આવી હતી. અત્યાર સુધીમાં 11 લોકોની ધરપકડ કરવામાં આવી છે. તેમાં 4 આતંકવાદીઓનો પણ સમાવેશ થાય છે, જેમણે કોન્સર્ટ હોલમાં કથિત રીતે ગોળીબાર કર્યો હતો. મૃત્યુઆંક 133 પર પહોંચી ગયો છે. જ્યારે અન્ય 107થી વધુ લોકો ગંભીર રીતે ઘાયલ થયા હતા.

આ કાયરતાપૂર્ણ હુમલાની જવાબદારી ISISએ લીધી છે. દરમિયાન, યુક્રેનના અધિકારીઓએ કહ્યું કે તેમના યુદ્ધગ્રસ્ત દેશ આ હુમલા પાછળ નથી. જોકે, રશિયન અધિકારીઓએ દાવો કર્યો છે કે હુમલાખોરોને યુક્રેન તરફથી મદદ મળી હતી.

રશિયન અધિકારીઓએ અગાઉ કહ્યું હતું કે ગોળીબારમાં 143 લોકો માર્યા ગયા હતા. જોકે, બાદમાં તેમણે કહ્યું કે 24 કલાકથી વધુ ચાલેલા સર્ચ ઓપરેશન બાદ 133 મૃતદેહો મળી આવ્યા છે. જ્યારે 107 લોકો ઘાયલ થયા છે. તેની હોસ્પિટલોમાં સારવાર ચાલી રહી છે.