મહાશિવરાત્રીએ શા માટે કરવામાં આવે છે રાત્રે જાગરણ?, જાણો ધાર્મિક-વૈજ્ઞાનિક મહત્ત્વ

• શિવરાત્રીનો તહેવાર ભગવાન શિવની પૂજા માટે શ્રેષ્ઠ માનવામાં આવે છે
  
• આ દિવસે ભક્તો પૂર્ણ ભક્તિભાવથી શિવની પૂજા કરે છે
• મહાશિવરાત્રીના દિવસે રાત્રિ જાગરણનું વિશેષ મહત્વ છે

સનાતન ધર્મમાં શિવરાત્રીનું વિશેષ મહત્વ છે. શિવરાત્રીનો તહેવાર ભગવાન શિવની પૂજા માટે શ્રેષ્ઠ માનવામાં આવે છે. આ તહેવાર દર વર્ષે મહા મહિનાના કૃષ્ણ પક્ષની ચતુર્દશી તિથિના રોજ ઉજવવામાં આવે છે. આ વખતે આ તહેવાર 18 ફેબ્રુઆરીએ ઉજવવામાં આવશે. આ દિવસે ભક્તો પૂર્ણ ભક્તિભાવથી શિવની પૂજા કરે છે. પૌરાણિક માન્યતાઓ અનુસાર, આ દિવસે ભગવાન શિવે માતા પાર્વતી સાથે કૈલાસ પર્વત પર લગ્ન કર્યા હતા. મહાશિવરાત્રીના દિવસે રાત્રિ જાગરણનું વિશેષ મહત્વ છે. આવો જાણીએ મહાશિવરાત્રીની રાતને આટલી ખાસ કેમ માનવામાં આવે છે.

મહાશિવરાત્રી શબ્દ ત્રણ શબ્દોથી બનેલો છે. આમાં મહા એટલે મહાન, શિવ આપણા દેવતા અને રાત્રી એટલે રાત. આ ત્રણ શબ્દોનો અર્થ 'શિવની મહાન રાત્રિ' છે. શિવ-પાર્વતી ઉપરાંત એવી પણ માન્યતા છે કે મહાશિવરાત્રીની રાત્રે ભગવાન શિવે તાંડવ નૃત્ય કર્યું હતું. આ નૃત્યને સર્જન અને વિનાશની અભિવ્યક્તિ તરીકે જોવામાં આવે છે. ધાર્મિક માન્યતાઓ અનુસાર આખી રાત જાગતા રહીને શિવ અને તેમની શક્તિ માતા પાર્વતીની પૂજા કરવાથી ભક્તોને શિવ અને મા પાર્વતીના વિશેષ આશીર્વાદ મળે છે. મહાશિવરાત્રીની રાત્રે જાગરણ કરવાથી જીવનની તમામ પરેશાનીઓ દૂર થઈ જાય છે. એટલા માટે મહાશિવરાત્રીની રાત્રે સૂવું ન જોઈએ.

મહાશિવરાત્રીને વૈજ્ઞાનિક દ્રષ્ટિકોણથી પણ મહત્વપૂર્ણ માનવામાં આવે છે. કહેવાય છે કે મહાશિવરાત્રીની રાત્રે બ્રહ્માંડમાં ગ્રહો અને નક્ષત્રોની એવી સ્થિતિ હોય છે કે એક ખાસ ઉર્જાનો પ્રવાહ વહે છે. રાત્રે જાગતા રહીને આ ઉર્જાનો ઉપયોગ આત્મ ચેતનામાં કરી શકાય છે. આધ્યાત્મિક રીતે વાત કરીએ તો, પ્રકૃતિ આ રાત્રે માણસને પરમાત્મા સાથે જોડે છે. તેનો પૂરો લાભ લેવા માટે મહાશિવરાત્રીની રાત્રે જાગરણ કરીને ધ્યાનની મુદ્રામાં બેસવાનું કહેવામાં આવ્યું છે.