Vaibhav Sooryavanshiએ 13 સિક્સ ફટકારવાનું આપ્યું વચન! કુમાર સંગાકારાએ કર્યો મોટો ખુલાસો

જો હાલમાં વિશ્વ ક્રિકેટમાં કોઈ ખેલાડી ચર્ચામાં છે, તો તે 15 વર્ષનો વૈભવ સૂર્યવંશી છે, જે ભારતીય ટીમનો યુવા ખેલાડી છે. બધાને આશા હતી કે વૈભવ સૂર્યવંશી આયર્લેન્ડ સામેની 2 મેચની T20 સિરીઝની પહેલી મેચમાં ડેબ્યૂ કરશે, પરંતુ તેને તક મળી નહીં. 

હવે રાજસ્થાન રોયલ્સના હેડ કોચ કુમાર સંગાકારાએ વૈભવ સૂર્યવંશી વિશે એક મહત્વપૂર્ણ નિવેદન આપ્યું છે, જેમાં સમજાવ્યું છે કે IPLની ગ્લેમર અને ખ્યાતિ તેના પર કેમ અસર કરતી નથી અને તે દબાણમાં કેમ આરામદાયક દેખાય છે. 

કુમાર સંગાકારાએ IPL 2026 દરમિયાન વૈભવ સૂર્યવંશી સાથે સંબંધિત એક ઘટનાનો પણ ખુલાસો કર્યો હતો જેણે તેને યુવાન ખેલાડીની પ્રતિભાથી સંપૂર્ણપણે આશ્ચર્યચકિત કરી દીધો હતો. બેટિંગ માટે ઉતરતા પહેલા 13 છગ્ગા મારવાનું વચન આપનાર સૂર્યવંશીએ એક મેચમાં 10 છગ્ગા ફટકાર્યા હતા.

વૈભવે 13 સિક્સ ફટકારવાનું આપ્યું હતું વચન

સ્કાય સ્પોર્ટ્સ શોમાં વૈભવ સૂર્યવંશીની ચર્ચા કરતી વખતે કુમાર સંગાકારાએ કહ્યું કે લખનૌ સુપર જાયન્ટ્સ સામેની IPL 2026ની મેચમાં અમને 220 રનનો ટાર્ગેટ આપવામાં આવ્યો હતો. બેટિંગ કરવા જતા પહેલા વૈભવ મારી પાસે આવ્યો અને આંખ મારીને કહ્યું કે "કોચ, ચિંતા ના કરો. તે થઈ જશે."

ત્યારબાદ તેને ડગઆઉટમાં બેઠેલા ડોનોવન ફેરેરા અને લુઆન-ડ્રે પ્રિટોરિયસને કહ્યું કે "સાંભળો, હું 13 છગ્ગા ફટકારવાનો છું. તે પછી તમે લોકો તેનું ધ્યાન રાખજો." વૈભવે 5-6 છગ્ગા ફટકાર્યા પછી, ફેરેરા અને પ્રિટોરિયસે એકબીજા સામે આશ્ચર્યથી જોયું. બંનેએ પાછળથી વૈભવની ઈનિંગના દરેક છગ્ગા ગણવાનું શરૂ કર્યું કે શું તેને ખરેખર 13 છગ્ગા ફટકાર્યા છે. આ વાત પરથી તમે સમજી શકો છો કે આ બાળકમાં કેટલો આત્મવિશ્વાસ છે.

ગુવાહાટી કેમ્પમાં જોફ્રા આર્ચર થઈ ગયો આશ્ચર્યચકિત 

વૈભવ સૂર્યવંશી વિશે કુમાર સંગાકારાએ રાજસ્થાન રોયલ્સના 2 અઠવાડિયા લાંબા ગુવાહાટી કેમ્પનો ઉલ્લેખ કરતા કહ્યું કે જ્યારે હું ત્યાં પહોંચ્યો ત્યારે જોફ્રા આર્ચર અને સંદીપ શર્મા નાના સાઈડ નેટ પર નવા બોલથી બોલિંગ કરી રહ્યા હતા અને કોઈ બેટ્સમેન તેમની સામે રમવા માટે તૈયાર ન હતો. તે સમયે વૈભવ સૂર્યવંશી આગળ આવ્યો અને કહ્યું કે હું બેટિંગ કરીશ, જેમાં બધાને જોફ્રા આર્ચરના ઝડપી બોલ પર શોટ રમવાની રીતનો આનંદ મળ્યો. આ દરમિયાન જોફ્રા આર્ચર પોતે એક સમયે હસ્યો, જેમાં તે પણ આશ્ચર્યચકિત થઈ ગયો કે આ 15 વર્ષનો બેટ્સમેન તેના ઝડપી બોલને આટલી સરળતાથી રમી રહ્યો હતો.

આ પણ વાંચો: Virat Kohli ક્રિકેટથી દૂર, પરિવાર સાથે ક્વોલિટી ટાઈમ... સ્ટાર ખેલાડી પુત્ર અકાયને પીઠ પર લઈને જતો મળ્યા જોવા