ICC વિમેન્સ T20 વર્લ્ડકપ 2026માં ભારતીય ટીમે ગ્રુપ A માં તેની પહેલી 2 મેચ જીતી હતી, પરંતુ માન્ચેસ્ટર સ્ટેડિયમમાં રમાયેલી ત્રીજી મેચમાં જે સાઉથ આફ્રિકાની મહિલા ટીમ સામે હતી, તેને 6 વિકેટથી હારનો સામનો કરવો પડ્યો હતો.
આ મેચમાં ટોસ જીતીને ટીમ ઈન્ડિયાએ પહેલા બેટિંગ કરી અને 158 રન બનાવ્યા, જે સાઉથ આફ્રિકાની મહિલા ટીમે 19.1 ઓવરમાં હાંસલ કરી લીધા. ટુર્નામેન્ટમાં પ્રથમ હાર બાદ ટીમ ઈન્ડિયાની કેપ્ટન હરમનપ્રીત કૌર ખૂબ જ નિરાશ દેખાઈ રહી હતી, જેમાં તેણે કહ્યું હતું કે ખરાબ બોલિંગ અને ફિલ્ડિંગ ટીમના પ્રદર્શનનું સૌથી મોટું કારણ છે.
આ તબક્કે આપણે તકોનો લાભ લેવો જોઈએ
સાઉથ આફ્રિકાની વિમેન્સ ટીમ સામે T20 વર્લ્ડકપ મેચ હાર્યા બાદ ભારતીય કેપ્ટન હરમનપ્રીત કૌરે મેચ પછીના પ્રેઝન્ટેશનમાં કહ્યું કે મેચની વચ્ચે અમારી પાસે વિકેટ લેવાની કેટલીક તકો હતી, પરંતુ અમે તેનો લાભ લઈ શક્યા નહીં. અમારી પાસે હજુ બે મેચ બાકી છે અને અમારે સકારાત્મક રહેવાની જરૂર છે.
શ્રી ચરણી અને શેફાલી બંનેએ આ મેચમાં ખૂબ સારી બોલિંગ કરી અને કેટલીક તકો બનાવી, પરંતુ અન્ય બોલરોએ તેમને અપેક્ષા મુજબ સપોર્ટ આપ્યો નહીં. આ સ્તરે તકોનો લાભ લેવો મહત્વપૂર્ણ છે. આગામી મેચ પહેલા અમારી પાસે હજુ 2 થી 3 દિવસ છે, જેમાં અમારે બેસીને અમારા ટીમ કોમ્બિનેશનની યોજના બનાવવાની જરૂર છે. જો તમે આ સ્તરે તકોનો લાભ લેવામાં નિષ્ફળ જાઓ છો, તો કંઈપણ તમારા માટે સરળતાથી આવતું નથી.
ટીમ ઈન્ડિયા માટે હવે સેમીફાઈનલનો રસ્તો મુશ્કેલ બન્યો
આ મેચ હાર્યા પછી પણ ભારતીય મહિલા ટીમ 3 મેચ રમ્યા બાદ 4 પોઈન્ટ સાથે ગ્રુપ A પોઈન્ટ ટેબલમાં બીજા નંબરે છે, જેમાં ટીમ ઈન્ડિયાનો નેટ રન રેટ સાઉથ આફ્રિકા કરતા ઘણો સારો છે. આ દરમિયાન જો ટીમ ઈન્ડિયા સેમીફાઈનલમાં પહોંચવાની રેસમાં ટકી રહેવા માગે છે, તો તેને ગ્રુપ સ્ટેજમાં બાકીની બંને મેચ જીતવી પડશે. આમાં તેઓ આગામી મેચમાં 25 જૂને બાંગ્લાદેશ મહિલા ટીમ સામે ટકરાશે, જ્યારે 28 જૂને તેઓ ઓસ્ટ્રેલિયન મહિલા ટીમ સામે રમશે.
આ પણ વાંચો: Virat Kohli ક્રિકેટથી દૂર, પરિવાર સાથે ક્વોલિટી ટાઈમ... સ્ટાર ખેલાડી પુત્ર અકાયને પીઠ પર લઈને જતો મળ્યા જોવા
