અમદાવાદ ગ્રામ્યના બાવળા તાલુકામાં તણાવભર્યો માહોલ જોવા મળી રહ્યો છે. બાવળા તાલુકાના ઢેઢાળ વાસણા ગામે જૂની અદાવતનો બદલો લેવા માટે એક યુવક પર ધારિયા જેવા તીક્ષ્ણ હથિયાર વડે જીવલેણ હુમલો કરવામાં આવતા સમગ્ર પંથકમાં ચકચાર મચી ગઈ છે. આ હુમલામાં યુવક ગંભીર રીતે ઇજાગ્રસ્ત થતા તેને તાત્કાલિક હોસ્પિટલ ખસેડવામાં આવ્યો છે.
જૂની અદાવતમાં લોહિયાળ હુમલો
ઘટનાની મળતી માહિતી અનુસાર, ઢેઢાળ વાસણા ગામમાં રહેતા ઇન્દ્રજીત મકવાણા નામના યુવક પર તે જ ગામના કાળુ ચૌહાણ નામના શખ્સે અચાનક હુમલો કર્યો હતો. બંને વચ્ચે લાંબા સમયથી જૂની અદાવત ચાલી રહી હતી. આ અદાવતનો ખાર રાખી કાળુ ચૌહાણે ઇન્દ્રજીતને રસ્તામાં આંતરીને ધારિયાના ઘા ઝીંકવાનું શરૂ કર્યું હતું.
