પૂર્વ કચ્છ ગાંધીધામ પોલીસના માર્ગદર્શન હેઠળ અંજાર પોલીસે ડ્રગ્સના ગુનામાં સામેલ ગુનેગારો સામે આકરી કાર્યવાહી શરૂ કરી છે. અંજારના વરસાણા ગામ ખાતેથી માદક પદાર્થ હેરોઈનના જથ્થા સાથે પકડાયેલા આરોપી પ્રકાશકુમાર બિશ્નોઈની કબજા ભોગવટાની હોટેલ (ઢાબા) પર પોલીસે PGVCLની ટીમને સાથે રાખી રેડ કરી હતી. આ કાર્યવાહી દરમિયાન હોટેલમાં ગેરકાયદેસર વીજ કનેક્શન હોવાનું ખુલતા વીજ જોડાણ કાપી નાખવામાં આવ્યું છે.
એનડીપીએસના આરોપી પર પોલીસની લાલઆંખ
મળતી માહિતી મુજબ, અંજાર પોલીસ સ્ટેશન વિસ્તારમાં NDPSના ગુનામાં અગાઉ પકડાયેલ આરોપી પ્રકાશકુમાર હરીંગારામ બિશ્નોઈ (રહે. પતરાવાળા ધાબામાં, વરસાણા) ની વરસાણા હાઈવે પર હોટેલ આવેલી છે. આ હોટેલમાં ગેરકાયદેસર રીતે વીજળીનો વપરાશ થતો હોવાની ચોક્કસ બાતમી પોલીસને મળી હતી. જેના આધારે અંજાર પોલીસ સ્ટાફ અને પી.જી.વી.સી.એલ.ની ટીમે સંયુક્ત તપાસ હાથ ધરી હતી.
