ડાયમંડ સિટી સુરતમાં કાયદો અને વ્યવસ્થાની સ્થિતિ કથળી રહી હોય તેમ લાગી રહ્યું છે. પોલીસ જે કામગીરીમાં નિષ્ફળ રહી છે, તે કામ હવે સામાન્ય જનતાએ કરવું પડી રહ્યું છે. સુરતના પ્રખ્યાત ડુમસ વિસ્તારમાં ગત રાત્રે ઘરફોડ ચોરી કરવાના ઈરાદે આવેલા એક ઈસમને સ્થાનિક લોકોએ સાવચેતી વાપરી રંગેહાથ ઝડપી લેવામાં આવ્યો હતો. આ ઘટનાને પગલે વિસ્તારમાં ચકચાર મચી ગઈ છે.
ચોરી કરે તે પહેલા જ ખેલ ખતમ
ઘટનાની મળતી માહિતી અનુસાર, ડુમસ વિસ્તારમાં એક શંકાસ્પદ ઈસમ ઘરફોડ ચોરી કરવાના ઈરાદે રેકી કરી રહ્યો હતો. આ તસ્કર કોઈ ઘરમાં ખાતર પાડે તે પહેલા જ જાગૃત રહી રહેલા સ્થાનિક લોકોની નજરે ચડી ગયો હતો. લોકોએ એકત્ર થઈને આ ચોરને ઘેરી લીધો હતો અને ભાગવાની તક આપે તે પહેલા જ તેને દબોચી લીધો હતો. લોકોએ તેને પકડી રાખ્યો હતો અને ત્યારબાદ પોલીસને જાણ કરવામાં આવી હતી.
પોલીસ પેટ્રોલિંગ પર ઉઠ્યા સવાલ
સુરત જેવા મેટ્રો શહેરમાં જ્યાં પોલીસ કમિશનર દ્વારા નાઈટ પેટ્રોલિંગના દાવા કરવામાં આવે છે, ત્યાં ડુમસ જેવા પોશ ગણાતા વિસ્તારમાં તસ્કરો બેફામ બન્યા છે. સ્થાનિકોમાં એ ચર્ચાએ જોર પકડ્યું છે કે જો લોકો જાગૃત ન હોત, તો મોટી ચોરીની ઘટના બની શકી હોત. પોલીસનું કામ લોકોએ કરવું પડી રહ્યું હોવાથી ખાખીની કામગીરી સામે ગંભીર સવાલો ઉભા થયા છે.
પોલીસને સોંપાયો તસ્કર
બનાવની જાણ થતા જ ડુમસ પોલીસ ઘટના સ્થળે પહોંચી હતી અને લોકોએ ઝડપેલા તસ્કરને પોલીસના હવાલે કર્યો હતો. પોલીસ દ્વારા આ ઈસમની અટકાયત કરી તેની પૂછપરછ હાથ ધરવામાં આવી છે કે તેની સાથે અન્ય કોઈ સાગરીતો સામેલ છે કે કેમ. સુરતના માર્ગો પર પોલીસની હાજરી વધારવાની માગ હવે ઉગ્ર બની રહી છે.
આ પણ વાંચો - Surat News: પૂણામાં લુખ્ખા તત્ત્વો બેફામ, યુવકને માર મારી કર્યું અપહરણ
