વડોદરા શહેરમાં માર્ગ અકસ્માતોનો સિલસિલો અટકવાનું નામ નથી લઈ રહ્યો. આજે વડોદરા શહેરના વ્યસ્ત ગણાતા ખંડેરાવ માર્કેટ વિસ્તારમાં વધુ એક અકસ્માતની ઘટના સામે આવી છે. જેમાં એક બેફામ પલ્સર બાઇક ચાલકે ફરજ પર રહેલા મહિલા પોલીસકર્મીને અડફેટે લેતા ચકચાર મચી જવા પામી છે.
ગંભીર ઇજા થતા હોસ્પિટલ ખસેડાયા
ઘટનાની મળતી માહિતી અનુસાર, મહિલા પોલીસ કર્મચારી જ્યારે ખંડેરાવ માર્કેટ પાસે હાજર હતા, ત્યારે એક પલ્સર બાઇક લઈને પસાર થઈ રહેલા યુવાને તેમને જોરદાર ટક્કર મારી હતી. આ ટક્કર એટલી જોરદાર હતી કે મહિલા પોલીસકર્મી રોડ પર પટકાયા હતા અને તેમને પગના ભાગે ગંભીર ઇજાઓ પહોંચી હતી. ઘટનાના પગલે આસપાસના લોકો એકઠા થઈ ગયા હતા અને તાત્કાલિક 108 એમ્બ્યુલન્સને જાણ કરવામાં આવી હતી. ઇજાગ્રસ્ત પોલીસકર્મીને સારવાર અર્થે નજીકની હોસ્પિટલમાં ખસેડવામાં આવ્યા છે.
