આર્થિક નગરી સુરતના સરથાણા વિસ્તારમાંથી એક હૃદયદ્રાવક ઘટના સામે આવી છે. અહીં આવેલી એક હોટલના રૂમમાં પરિણીત દંપતીએ અગમ્ય કારણોસર આત્મહત્યા કરવાનો પ્રયાસ કર્યો હતો. આ ઘટનાને પગલે સમગ્ર વિસ્તારમાં ચકચાર મચી ગઈ છે.
લા મરિના હોટલમાં આત્મહત્યાનો પ્રયાસ
મળતી માહિતી અનુસાર, સરથાણા વિસ્તારમાં આવેલી 'લા મરિના હોટલ'ના એક રૂમમાં આ દંપતીએ આ પગલું ભર્યું હતું. ઘટનાની જાણ થતાં જ હોટલ સ્ટાફ અને સ્થાનિક લોકોએ બંનેને તાત્કાલિક સારવાર માટે નજીકની હોસ્પિટલમાં ખસેડ્યા હતા. જોકે, હોસ્પિટલમાં સારવાર દરમિયાન કમનસીબે પત્નીનું મોત નીપજ્યું છે, જ્યારે પતિની સ્થિતિ હજુ ગંભીર હોવાનું કહેવાય છે અને તે હાલ ડોક્ટરોની દેખરેખ હેઠળ સારવાર મેળવી રહ્યો છે.
