100થી વધુ ફિલ્મોમાં કામ કરનારા દિગ્ગજ ભોજપુરી એક્ટર ગોપાલ રાયનું થયું નિધન

ભોજપુરી ફિલ્મ ઈન્ડસ્ટ્રીમાંથી એક દુઃખદ સમાચાર આવ્યા છે. પોતાના અભિનય અને સાદગી માટે જાણીતા દિગ્ગજ અભિનેતા ગોપાલ રાયનું નિધન થયું છે. તેઓ 76 વર્ષના હતા. તે બિહારના મુઝફ્ફરપુરના માધૌલનો હતા. તેમણે ભોજપુરી સિનેમામાં પોતાની એક અલગ ઓળખ બનાવી હતી.

ગોપાલ રાયે ઘણા મોટા ભોજપુરી કલાકારો સાથે કામ કર્યું હતું અને તેમના ઉત્તમ અભિનય માટે તેમને ભોજપુરી ફિલ્મ એવોર્ડ અને બિહાર ફિલ્મ એવોર્ડ જેવા ઘણા પ્રતિષ્ઠિત પુરસ્કારોથી નવાજવામાં આવ્યા હતા. તેમના અંતિમ સંસ્કાર સોમવાર, 26 મે ના રોજ રેવા ઘાટ ખાતે કરવામાં આવશે.

ફિલ્મ ઉદ્યોગમાં 38 વર્ષ કર્યું કામ

ગોપાલ રાયે તેમની કારકિર્દીમાં મોટે ભાગે સહાયક પાત્રો ભજવ્યા હતા. પરંતુ સહાયક ભૂમિકાઓ દ્વારા જ તેમણે લોકોના દિલમાં ખાસ સ્થાન બનાવ્યું. તેઓ છેલ્લા 38 વર્ષથી ફિલ્મ ઉદ્યોગનો ભાગ હતા. તેમણે 1987માં રિલીઝ થયેલી ફિલ્મ 'ગંગા કિનારે મોરા ગાંવ' થી સહાયક કેમેરામેન તરીકે પોતાની કારકિર્દીની શરૂઆત કરી હતી. આ ફિલ્મમાં તેઓ એક નાના રોલમાં પણ જોવા મળ્યા હતા.

પોતાની કારકિર્દી શરૂ કર્યા પછી, ગોપાલ રાય એક પછી એક ઘણી મહાન ફિલ્મોનો ભાગ બન્યા. તેમને પોતાના કરિયરમાં 100 થી વધુ ફિલ્મોમાં કામ કર્યું. તેઓ ખેસારી લાલ યાદવની ફિલ્મ 'રાજા જાની', પવન સિંહની ફિલ્મ 'ચેલેન્જ', નિરહુઆની ફિલ્મ 'નિરહુઆ ચલે લંડન' અને 'નિરહુઆ ચલે અમેરિકા' સહિત ઘણી મોટી સ્ટાર ફિલ્મોનો ભાગ હતા. તેમણે ઘણી ફિલ્મોમાં એક્શન રોલ પણ કર્યા.

લાઈમલાઈટથી દૂર રહેતા હતા ગોપાલ રાય

ગોપાલ રાય લાઈમલાઈટથી દૂર રહેતા હતા, પરંતુ જ્યારે પણ તેઓ પડદા પર આવતા ત્યારે તેઓ પોતાના ઉત્તમ અભિનયથી લોકોના દિલ જીતી લેતા હતા. તેમના અભિનયમાં સરળતા અને શાંતિ હતી, જે લોકોને ખૂબ ગમતી. તેમનું અચાનક જવું ભોજપુરી ઉદ્યોગ માટે મોટો આઘાત છે. ભોજપુરી સિનેમા હંમેશા તેમની ખોટ સાલશે.